మంచులో వైఎస్ గరం గరం

మాజీ ముఖ్యమంత్రి చంద్రబాబు నాయుడిని రాహుల్ గాంధీ పొగడ్తలతో ముంచెత్తడం వ్యూహాత్మక చర్యలా కన్పిస్తోంది. ఈ విషయంలో రాహుల్ పిల్లకాకిలా వ్యవహరించారని కాంగ్రెస్ వృద్ధులు విమర్శిస్తున్నా రాజనీతి సూత్రాన్ని పాటించే రాహుల్ బాబును, బీహార్ ముఖ్యమంత్రి నితిష్ కుమార్ ను పొగిడారని తెలుస్తోంది. కేంద్రంలో యుపిఎ సంకీర్ణ ప్రభుత్వాన్ని ఏర్పాటు చేయడానికి వెలుపలి నుంచైనా వామపక్షాల, టిడిపి మద్దతు తీసుకోవాలన్నది రాహుల్ వ్యూహం. వారు బిజెపి నాయకత్వంలోని ఎన్డీఏకు వ్యతిరేకం కాబట్టి తమ సంకీర్ణానికే మద్దతు ఇస్తారన్నది ఆయన నమ్మకం.

రాహుల్ చంద్రబాబు అభివృద్ధి దృక్పధాన్ని మెచ్చుకోవడం సిమ్లా ఉన్న సిఎం రాజశేఖరరెడ్డికి మండుకొచ్చిందని చెబుతున్నారు. అంత మంచుకొండల్లా ఉన్నా ఆయన భగభగ మండిపోయి ఉంటారని ఆయన క్యాంప్ వర్గాలు ఇక్కడ చెవులు కొరుక్కుంటున్నాయి. రేపు ఉదయం హైదరాబాద్ మీడియా ముందుకు రానున్న వైఎస్ రాహుల్ వ్యాఖ్యలపై జవాబు చెప్పుకోవలసిన పరిస్ధితి ఏర్పడవచ్చు. దీనిపై సోనియాగాంధీతో నేరుగా మాట్లాడి తన నిరసన తెలిపే ధైర్యం వైఎస్ చేయకపోవచ్చు. రాష్ట్రంలో కాంగ్రెస్ గెలుపు అసాధ్యమని, మహా కూటమే అధికారంలోకి వస్తుందని ఒక అభిప్రాయానికి వచ్చిన తర్వాతే రాహుల్ ఈ వ్యాఖ్య చేశారని మరో అభిప్రాయం విన్పిస్తోంది.