జగన్‍‌కు చిరును అడ్డం పెట్టేందుకే....

వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిని దీటుగా ఎదుర్కోవడానికే చిరంజీవి వర్గానికి చెందిన సి. రామచంద్రయ్యకు మంత్రి పదవి ఇచ్చారట. రామచంద్రయ్యకు మంత్రి పదవి ఇవ్వకుంటే తన మాట నెగ్గలేదనే ఉద్దేశంతో చిరంజీవి జగన్‌ను ఎదుర్కోవడానికి మనస్ఫూర్తిగా ముందుకు రారనే ఉద్దేశంతో కాంగ్రెసు పార్టీ అధిష్టానం ఉన్నట్లు చెబుతున్నారు. ఇదే విషయాన్ని ముఖ్యమంత్రి కిరణ్ కుమార్ రెడ్డి తనను కలిసిన కడప జిల్లా నాయకులు వీరశివా రెడ్డి, చెంగల్రాయుడు తదితరులకు చెప్పారని సమాచారం. సి. రామచంద్రయ్యకు మంత్రి పదవి ఇవ్వకూడదని వారు అధిష్టానానికి కూడా మొర పెట్టుకున్నారు. చివరి వరకు పోరాటం చేసి ఓడిపోయారు.

కడప జిల్లాలో మూడు శాసనసభా నియోజకవర్గాలకు ఉప ఎన్నికలు జరగనున్నాయని, ఈ నియోజకవర్గాల్లో జగన్ ప్రాబల్యానికి చిరంజీవి ఇమేజ్‌ను అడ్డం పెట్టాలని పార్టీ అధిష్టానం ఆలోచిస్తోందని, అందువల్ల చిరంజీవి మాటకు విలువ ఇచ్చి రామచంద్రయ్యకు మంత్రి పదవి ఇవ్వాల్సి వచ్చిందని ముఖ్యమంత్రి వివరించారని సమాచారం. దీంతో కడప జిల్లా నేతలు చేసేది లేక నిరాశతో వెనక్కి తిరిగిపోయారని అంటున్నారు.

English summary

It is learnt that CM Kiran Kumar Reddy has clarified about importance given to C Ramachandraiah.