టేస్టీ టేస్టీ "పొట్లకాయ ఫ్రై" ఈజీగా ఎలా చేయాలంటే..?

తెలుగు వంటల్లో బాగా ప్రసిద్ధి చెందింది పొట్లకాయ (స్నేక్ గార్డ్). వేసవికాలంలో ఎక్కువగా లభించే పొట్లకాయ తేలికగా జీర్ణమవుతుంది. దీన్ని రోజువారీ ఆహారంలో చేర్చుకుంటే శరీరంలో వేడి తగ్గించి, అలసటను దూరం చేయడంలో ఇది సహాయపడుతుంది. తక్కువ కేలరీలు, అధిక నీటి శాతం ఉండటం వల్ల ఆరోగ్యాన్ని కాపాడే కూరగాయగా ఇది గుర్తింపు పొందడంతో పాటు పోషక విలువలు కూడా లభిస్తాయి.

అంతే కాకుండా పొట్లకాయలో ఉండే ఫైబర్, విటమిన్ C, విటమిన్ B, ఐరన్, మాగ్నీషియం వంటి పోషకాలు ఉన్నాయి. ఇవి జీర్ణక్రియను మెరుగుపరచడమే కాకుండా.. కడుపు సమస్యలు తగ్గించడంతో పాటు మధుమేహం ఉన్నవారికి కూడా పొట్లకాయ కూర అనుకూలంగా ఉంటుంది. నూనె, ఆవాలు, జీలకర్ర, ఎండుమిర్చి, కరివేపాకు వేసి పొట్లకాయ ముక్కలను వేయించడం ద్వారా ఈ కూరను తయారు చేస్తారు. కొద్దిగా ఉల్లిపాయలు, పచ్చిమిర్చి, పసుపు, ఉప్పు వేసి మగ్గిస్తే సరళమైన కానీ రుచికరమైన కూర సిద్ధమవుతుంది. కొందరు దీనికి శెనగపిండి లేదా కొబ్బరి పొడి కలిపితే ప్రత్యేక రుచి కూడా వస్తుంది.

ఆరోగ్యాన్ని కాపాడుకోవాలనుకునే వారు తమ రోజువారీ ఆహారంలో పొట్లకాయ కూరను తప్పకుండా చేర్చుకోవాలి. పొట్లకాయతో అనేక రకాల వంటకాలు చేయవచ్చు. సాదా పొట్లకాయ కూరతో పాటు పొట్లకాయ పప్పు, పొట్లకాయ పులుసు, పొట్లకాయ వేపుడు, పొట్లకాయ పెరుగు పచ్చడి వంటి వంటలు కూడా ఎంతో ప్రాచుర్యంలో ఉన్నాయి. తక్కువ నూనెతో వండిన పొట్లకాయ కూర అన్నం, చపాతీతో అద్భుతంగా సరిపోతుంది. రుచి, ఆరోగ్యం రెండింటినీ సమపాళ్లలో అందించే కూరగాయగా పొట్లకాయను చెప్పుకోవచ్చు. పొట్లకాయ ఫ్రై ఆరోగ్యానికి ఎంతో మేలు చేస్తుంది. తక్కువ సమయంలో రుచికరంగా చేసుకునే ఈ ఫ్రై ఎలా తయారు చేయాలో మీకోసం ప్రత్యేకంగా..

కావలసిన పదార్థాలు:

పొట్లకాయ: అర కిలో (ముక్కలుగా తరిగినవి)

ఉల్లిపాయ: 1 పెద్దది (సన్నని తరుగు)

పచ్చిమిర్చి: 3-4 (చీలికలు)

పోపు దినుసులు: 1 స్పూన్ (ఆవాలు, జీలకర్ర, మినప్పప్పు, శనగపప్పు)

కరివేపాకు: రెండు రెబ్బలు

పసుపు: పావు స్పూన్

ఉప్పు: రుచికి తగినంత

కారం: 1 స్పూన్ (లేదా రుచిని బట్టి)

వెల్లుల్లి రెబ్బలు: 4-5 (కచ్చాపచ్చాగా దంచినవి)

నూనె: 2 టేబుల్ స్పూన్లు

తయారీ విధానం..

శుభ్రం చేయడం: పొట్లకాయపై ఉన్న తెల్లని పొరను చాకుతో కొద్దిగా గీకి, లోపల ఉన్న గింజలను తీసేయాలి. ఆపై చిన్న ముక్కలుగా కోసి పెట్టుకోవాలి.

పోపు పెట్టడం: బాండీలో నూనె వేసి వేడయ్యాక, ఆవాలు, జీలకర్ర, మినప్పప్పు, శనగపప్పు వేసి చిటపటలాడించాలి.

తాలింపు: అందులో దంచిన వెల్లుల్లి, ఎండుమిర్చి, కరివేపాకు, పచ్చిమిర్చి వేసి వేయించాలి. ఆపై ఉల్లిపాయ ముక్కలు వేసి దోరగా వేయించాలి.

ముక్కలు వేయడం: ఇప్పుడు కోసి పెట్టుకున్న పొట్లకాయ ముక్కలు, పసుపు, కొద్దిగా ఉప్పు వేసి బాగా కలపాలి. (ముక్కల్లో నీరు పోవడానికి మూత పెట్టి 5-8 నిమిషాలు మగ్గనివ్వాలి).

ఫ్రై చేయడం: ముక్కలు మెత్తబడ్డాక మూత తీసేసి, నీరంతా పోయి వేగే వరకు మధ్య మధ్యలో కలుపుతూ ఉండాలి.

చివరగా కారం వేసి 2 నిమిషాలు వేయించి, కావాలంటే కొద్దిగా కొబ్బరి తురుము లేదా వేయించిన పల్లీల పొడి చల్లుకుంటే రుచి అద్భుతంగా ఉంటుంది.

చిట్కా..

పొట్లకాయ ముక్కలకు కొంచెం ఉప్పు రాసి పిండితే అందులోని నీరు బయటకు వస్తుంది, ఇలా చేస్తే ముక్కలు త్వరగా వేగుతాయి.

English summary

Gourd (snake guard) is very popular in Telugu cuisine. Gourd, which is widely available during summers, is easily digestible. Including it in your daily diet helps in reducing heat in the body and warding off fatigue.