నయా స్టైల్ 'టమాటో పూదీనా చట్నీ'.. ఇలా చేస్తే లొట్టలేసుకుంటూ తింటారు..!

చాలామందికి టమాటో పచ్చడి అంటే ఇష్టం ఉంటుంది. ఇంట్లో కూరలు లేనప్పుడు.. మిగతా కర్రీలు తినాలని అనిపించనపుడు ఈ పచ్చడిని చేసుకుంటూ ఉంటారు. టమాటో పచ్చడి లంచ్ బాక్స్ లోనూ భలే కమ్మగా ఉంటుంది. టమాటో పచ్చడిలో కాస్త పూదీనా యాడ్ చేస్తే ఆ టేస్టు ఇంకా బాగుంటుంది. మరి సూపర్ టేస్టీ టమాటో పూదీనా చట్నీ తయారీకి కావాల్సిన పదార్థాలు ఏంటి..? ఈ పచ్చడిని ఎలా తయారు చేసుకోవాలి..?

టమాటో పూదీనా చట్నీ తయారీకి కావాల్సిన పదార్థాలు చూస్తే.. టమాటోలు, చింతపండు, పూదీనా, పచ్చిమిర్చి, ఆవాలు, నువ్వులు, జీలకర్ర, మినప్పప్పు, శనగపప్పు, నూనె, ఉప్పు తగినంత తీసుకోవాలి. ఇప్పుడు ఈ చట్నీ తయారీ విధానం చూస్తే.. ముందుగా స్టవ్ ఆన్ చేసి దానిపై గిన్నె పెట్టుకోవాలి. అందులో నువ్వులు వేసి వేయించుకోవాలి. తర్వాత వాటిని మిక్సీ జార్ లో వేసి గ్రైండింగ్ చేసుకోవాలి.

ఇప్పుడు అదే గిన్నెలో తగినంత నూనె వేసి వేడి చేసుకోవాలి. నూనె వేడెక్కిన తర్వాత అందులో జీలకర్ర, పచ్చిమిర్చి, వెల్లుల్లి వేసి బాగా వేయించుకోవాలి. ఇవి వేగిన తర్వాత ఆ మిశ్రమంలో టమాటో ముక్కలు, చింతపండు, రుచికి సరిపడా ఉప్పు వేసి దగ్గరకు అయ్యేంత వరకూ మగ్గించుకోవాలి. టమాటోలు మగ్గిన తర్వాత ఆ మిశ్రమంలోనే పూదీనా ఆకులు వేయాలి. మరో 2 నిమిషాలు వేయించుకోవాలి. ఆ తర్వాత స్టవ్ ఆఫ్ చేసుకోవాలి.

ఆ తర్వాత టమాటో మిశ్రమం చల్లారిన తర్వాత దీనిని మిక్సీ జారులో వేసి బరకగా అయ్యేంత వరకూ మిక్సీ పట్టుకోవాలి. ఇప్పుడు తాళింపు చేసుకోవాలి. తాళింపు కోసం స్టవ్ పైన పాన్ పెట్టుకోవాలి. అందులో ఆవాలు, మినప్పప్పు, శనగపప్పు వేయించుకోవాలి. ఇప్పుడు ఆ తాళింపులో మిక్సీ పట్టిన టమాటో పేస్టును వేసి ఆ తర్వాత నువ్వుల పొడి కూడా వేయాలి. నూనె పైకి తేలిన తర్వాత స్టవ్ ఆఫ్ చేసుకోవాలి. అంతే సూపర్ టేస్టీ టమాటో పూదీనా చట్నీ రెడీ అయినట్టే..