జన్మ నక్షత్రం పునర్వసు, పుష్యమి, ఆశ్లేష ఉన్నవారి ఏప్రిల్ నెల జాతక ఫలం

తెలుగు సంప్రదాయం, వేద జ్యోతిష్య శాస్త్రం ప్రకారం జన్మ నక్షత్రానికి అత్యంత ప్రాధాన్యత ఉంది. ఒక వ్యక్తి పుట్టినప్పుడు చంద్రుడు ఏ నక్షత్రంలో ఉంటే, దాన్నే ఆ వ్యక్తి 'జన్మ నక్షత్రం' అని పిలుస్తారు. జాతక చక్రం మొత్తం ఈ జన్మ నక్షత్రం ఆధారంగానే నిర్మించబడుతుంది. జ్యోతిష్య శాస్త్రం ప్రకారం చంద్రుడు మనస్సుకు అధిపతి. కాబట్టి, పుట్టినప్పుడు చంద్రుడు ఉన్న నక్షత్రం ఆ వ్యక్తి ఆలోచనా తీరును, ప్రవర్తనను, స్వభావాన్ని నిర్ణయిస్తుంది. మనకు తెలుగులో 27 నక్షత్రాలున్నాయి.

ఇవి కాకుండా ఉత్తరాషాఢ, శ్రవణా నక్షత్రాల మధ్య సూక్ష్మమైన అభిజిత్ నక్షత్రం ఉంటుంది. శుభ ముహూర్తాల కోసం దీన్ని పరిగణనలోకి తీసుకుంటారు. నక్షత్రం మాత్రమే మొత్తం జాతకాన్ని నిర్ణయించదు. జాతక చక్రంలో ఉండే లగ్నం, ఇతర గ్రహాల స్థితి , అవి ఇచ్చే దృష్టి కూడా ఫలితాలను మారుస్తాయి. అందుకే నక్షత్రాన్ని జాతకానికి పునాదిగా తీసుకుంటారు. వ్యక్తిగత జాతకంలోని గ్రహ స్థితులు, దశలను బట్టి ఫలితాల్లో అప్పుడప్పుడు స్వల్ప మార్పులు చోటుచేసుకునే అవకాశం ఉంటుంది.

పునర్వసు నక్షత్రం (మిథునం 4వ పాదం & కర్కాటకం 1, 2, 3 పాదాలు)

పునర్వసు నక్షత్ర జాతకులకు ఏప్రిల్ నెల చాలా అనుకూలంగా ఉంటుంది. కొంతకాలంగా ఆగిపోయిన పనులు వేగవంతం అవుతాయి. ఆఫీసులో మీ పనితీరుకు గుర్తింపు లభిస్తుంది. కొత్త బాధ్యతలు స్వీకరించే అవకాశం ఉంది. పై అధికారుల నుండి సహాయ సహకారాలు అందుతాయి. పనితీరును అందరూ మెచ్చుకుంటారు. ఆదాయ మార్గాలు పెరుగుతాయి. గతంలో చేసిన అప్పులు తీర్చేస్తారు. అనవసర ఖర్చులు తగ్గుతాయి. ఆరోగ్యం నిలకడగా ఉంటుంది. అయితే, గొంతు లేదా నడుము నొప్పి వంటి చిన్న సమస్యలు రావచ్చు. సరైన విశ్రాంతి తీసుకుంటే చాలు. గురువారం రోజున దక్షిణామూర్తిని దర్శించుకోవడం లేదా గురు స్తోత్రం పఠించడం వల్ల మరిన్ని శుభ ఫలితాలు కలుగుతాయి.

పుష్యమి నక్షత్రం (కర్కాటక రాశి)

పుష్యమి నక్షత్రం వారికి ఈ నెల శ్రమతో కూడిన విజయం లభిస్తుంది. ఒత్తిడి ఉన్నప్పటికీ లక్ష్యాలను చేరుకుంటారు. పని ప్రదేశంలో పోటీ పెరుగుతుంది. తోటి ఉద్యోగులతో జాగ్రత్తగా ఉండాలి. వ్యాపారస్తులకు నూతన ఒప్పందాలు కుదిరే అవకాశం ఉంది. అయితే వాటిపై సంతకాలు చేసేటప్పుడు జాగ్రత్తగా ఉండటం అవసరం. కుటుంబంలో శుభకార్యాల ప్రస్తావన వస్తుంది. సంతానానికి సంబంధించిన విషయాల్లో శుభవార్తలు వింటారు. స్థిరాస్తి లేదా వాహన కొనుగోలుకు ప్రయత్నాలు చేస్తారు. ఆర్థికంగా ఎవరికీ హామీలు ఇవ్వొద్దు.. అలాగే పూచీగా ఉండొద్దు. శనివారం రోజున ఆంజనేయ స్వామికి ఆకుపూజ చేయించడం లేదా శివాలయ దర్శనం చేయడం మీకు శుభప్రదం.

ఆశ్లేష నక్షత్రం (కర్కాటక రాశి)

ఆశ్లేష నక్షత్ర జాతకులకు ఏప్రిల్ నెల మిశ్రమ ఫలితాలను ఇస్తుంది. భావోద్వేగాలను నియంత్రించుకోవాల్సిన సమయం ఇది. ఉద్యోగ మార్పు కోసం చూస్తున్న వారికి ఇది అనుకూల సమయం. అవకాశాలు వస్తాయి. ఆవేశంతో మాత్రం నిర్ణయాలు తీసుకోవద్దు. వ్యాపారంలో మార్పులు చేర్పులు చేయడానికి ఇది మంచి సమయం కాదు. కొంతకాలం వేచిచూడండి. జీవిత భాగస్వామితో చిన్నపాటి మనస్పర్థలు రావచ్చు. మృదువుగా మాట్లాడుకుంటే ఎటువంటి గొడవలు రావు. దూరపు బంధువుల నుండి సమాచారం అందుతుంది. ప్రయాణాలు చేస్తారు. ఖర్చులు పెరిగే అవకాశం ఉంది. ప్రయాణాల వల్ల ధన నష్టం జరగకుండా జాగ్రత్త పడండి. కడుపు సంబంధిత సమస్యలు లేదా అలసట వచ్చే సూచనలున్నాయి. సరైన ఆహార నియమాలు పాటిస్తే చాలు. బుధవారం రోజున విష్ణు సహస్రనామ పారాయణం చేయడం లేదా రావి చెట్టుకు ప్రదక్షిణలు చేయడం వల్ల దోషాలు తొలగిపోతాయి.

English summary

April Month: those born under the Punarvasu, Pushyami, and Ashlesha birth stars can expect favorable results. Care should be taken to avoid unnecessary expenditure while traveling. Gastrointestinal issues and throat pain may cause discomfort; therefore, necessary precautions should be taken.