బాలకృష్ణ కాల్పుల కేసు పునర్విచారణ

హైదరాబాద్‌ : సినీ నటుడు బాలకృష్ణ నివాసంలో జరిగిన కాల్పుల కేసు పునర్విచారణకై హైకోర్టులో పిటిషన్‌ దాఖలు చేసినట్లు మంగళవారం పోలీసు కమిషనర్‌ ప్రసాదరావు స్పష్టం చేశారు. అయితే ఈ కేసులో ప్రభుత్వ ప్రమేయం ఉన్నదని వస్తున్న వార్తల్లో వాస్తవం లేదని, ప్రాథమిక సాక్ష్యాలను పరిగణలోకి తీసుకుని ఈ పిటిషన్‌ దాఖలు చేశామని చెప్పారు.

గత కొద్ది రోజులుగా బాలయ్య కేసు తిరగతోడుతారనే వార్త ప్రచారంలో ఉంది. అయితే ఇప్పుడు ఇలా పునర్విచారణకు కోర్టు కి వెళ్ళటం ఆ వార్తకు బలం చేకూర్చినట్లయింది. అలాగే ఈ వార్త పార్టీ వర్గాల్లో ఒకింత సంచలనం రేపుతోంది. ఓ ప్రక్క షూటింగ్ లలో పాల్గొంటూనే బాలయ్య తెలుగు దేశం ప్రచారంలో పాల్గొనటం..అతను రాకతో పార్టీలో మునపటి ఉషారు తొంగిచూడటం జీర్ణించుకోలేకే ఇటువంటి నిర్ణయాలు తీసుకుంటున్నారా అని కొందరు చర్చిస్తున్నారు. అయితే దీనిపై ఎవరూ బహిరంగంగా స్పందించటం లేదు.