సంజయ్ దత్ కు జనం ఘన స్వాగతం

లక్నో: సమాజ్‌ వాదీ పార్టీ తరఫున లక్నో లోక్‌సభ స్థానానికి పోటీ చేస్తానని ప్రకటించిన సినీ నటుడు సంజయ్‌ దత్ కు ప్రజల మద్దతు భారీగా లభిస్తోంది. లక్నోలో ఈరోజు నిర్వహించాల్సిన మొదటి ర్యాలీకి హాజరయ్యేందుకు ఇక్కడికి వచ్చిన సంజయ్‌కు విమానాశ్రయంలో ఘన స్వాగతం లభించింది.

ప్రజలను ఆకట్టుకోవడానికి సంజయ్‌ బైక్‌పై ర్యాలీగా బయలుదేరారు. రోడ్లకు ఇరువైపులా పెద్దఎత్తున జనం నిలబడి సంజయ్‌కు మద్దతుగా నినాదాలు చేశారు. ఈ ర్యాలీలో సంజయ్‌ భార్య మాన్యత, భోజ్‌పురి సినిమా సూపర్‌స్టార్‌ మనోజ్‌తివారీ కూడా పాల్గొన్నారు. సంజయ్ దత్ కూడా సమాజ్ వాది పార్టీలో చేరితే ఆ పార్టీలో సూపర్ స్టార్ల సంఖ్య పెరుగుతుంది. అమితాబ్ బచ్చన్(పరోక్షంగా), జయబాధురి, జయప్రద ఇప్పటికే ఆ పార్టీకి సేవలు అందిస్తున్నారు.