వైయస్ మార్కు ఫలితాల అంచనా

హైదరాబాద్: వచ్చే ఎన్నికల్లో తమ కాంగ్రెస్ పార్టీ ఘన విజయం సాధిస్తుందని ముఖ్యమంత్రి డాక్టర్ వైయస్ రాజశేఖర రెడ్డి ధీమా వ్యక్తం చేశారు. రాష్ట్ర శాసనసభ సీట్లలో ప్రతిపక్షాలు 30 సీట్లు మాత్రమే గెలుస్తాయని, మిగతా సీట్లన్ని కాంగ్రెస్ గెలుచుకుంటుందని ఆయన అన్నారు. ప్రకాశం, గుంటూరు, నెల్లూరు, కృష్ణా, అనంతపురం జిల్లాల్లో తమకు తెలుగుదేశం పార్టీకి మధ్యనే పోటీ ఉంటుందని, రాయలసీమలో ఒక్క అనంతపురం జిల్లాలో మాత్రమే తెలుగుదేశం పార్టీ ఖాతా తెరుస్తుందని ఆయన సోమవారం మీడియా ప్రతినిధులతో అన్నారు. తెలంగాణలో తెలంగాణ రాష్ట్ర సమితి (తెరాస) సీట్లన్నీ ప్రజారాజ్యం పార్టీ గెలుచుకుంటుందని ఆయన జోస్యం చెప్పారు. తెలంగాణ సెంటిమెంటుతో టికెట్ల పంపకానికి సంబంధం లేదని, గెలిచే వారికే టికెట్లు ఇస్తామని ఆయన అన్నారు. తమ పార్టీ బలం రోజు రోజుకూ పెరుగుతోందని ఆయన అన్నారు. కాంగ్రెస్ పార్టీలో గ్రూపులు లేవని, అదే తమ బలమని ఆయన అన్నారు.

రాయలసీమ, కోస్తా జిల్లాల్లో తెలుగుదేశం, పిఆర్పీ 15 అసెంబ్లీ స్థానాలను మాత్రమే గెలుచుకుంటాయని ఆయన చెప్పారు. చిరంజీవికి శ్రీకాకుళం జిల్లా నుంచి పశ్చిమ గోదావరి జిల్లా వరకు 8 అసెంబ్లీ స్థానాలు మాత్రమే వస్తాయని ఆయన చెప్పారు. తెలంగాణలోని ఆదిలాబాద్, నిజామాబాద్, రంగారెడ్డి మహబూబ్ నగర్, మెదక్, హైదరాబాద్ జిల్లాల్లో కాంగ్రెస్ బలంగా ఉందని, తెలంగాణ రాష్ట్ర సమితి బలహీనపడుతోందని ఆయన అన్నారు. మహాకూటమికి సిద్ధాంతులు ఉన్నారు తప్ప సిద్ధాంతాలు లేవని ఆయన వ్యాఖ్యానించారు. కోస్తా, రాయలసీమ ప్రాంతాల్లో తమకు 25 లోకసభ స్థానాలు వస్తాయని, తెలంగాణలో 8 నుంచి 12 సీట్లు గెలుస్తామని ఆయన చెప్పారు.