బాధగానే ఉంది, అయితే...: చిరు

హైదరాబాద్‌: చిరంజీవి మళ్లీ కెమెరా ముందుకు వచ్చారు. అయితే సినిమాల్లో నటించేందుకు ఆయన కెమెరా ముందుకు రాలేదు. ప్రజారాజ్యం పార్టీ తరపున రూపొందిస్తున్న ప్రకటనలో నటించేందుకు ఆయన కెమెరా ముందుకు వచ్చారు. పార్టీ పబ్లిసిటీ విభాగం ఛైర్మన్‌ మూర్తి శ్రీనివాసులు నేతృత్వంలో తయారవుతున్న టీవీ ప్రకటనకు సంబంధించిన షూటింగ్‌లో ఆయన పాల్గొన్నారు.

దాదాపు గంటన్నరపాటు ఈ షూటింగ్‌ జరిగింది. ప్రజా సమస్యలు, పార్టీ లక్ష్యాలు, సిద్ధాంతాలు గురించి వివరించేందుకు రూపొందిస్తున్న ఈ ప్రకటనలు త్వరలో అన్ని టీవీ ఛానళ్లలో ప్రసారంకానున్నాయి. ఇప్పటికే చిరంజీవి పార్టీకి చెందిన మూడు ప్రకటనల్లో తన గొంతు వినిపించారు. చాలారోజుల తరువాత మళ్లీ కెమెరాముందుకు రావటం ఎంతో సంతోషంగా ఉందని చిరంజీవి ఈ సందర్భంగా అన్నారు. సినిమా వాతావరణాన్ని కోల్పోతున్నందుకు బాధగా ఉన్నా ప్రజలకు మరో రూపంలో దగ్గరవుతున్నందుకు ఆనందంగా ఉందని అన్నారు.