మహిళల ప్రగతికి మైమరిచిన సోనియా

హైదరాబాద్‌: ఆంధ్రప్రదేశ్‌ మహిళలు ప్రపంచానికే ఆదర్శమని, వారిని చూసినప్పుడల్లా తనకు ఎంతో ఆనందం సాటి మహిళగా మరెంతో గర్వం కలుగుతాయని యుపిఏ ఛైర్మన్‌ సోనియా గాంధీ అన్నారు. రెండు రోజుల పర్యటన నిమిత్తం రాష్ట్రానికి వచ్చిన ఆమె బేగంపేట విమానాశ్రయంలో అభయహస్తం పథకం కింద లబ్ది పొందిన మహిళలతో మాట్లాడారు.

మహిళలు స్వయం సమృద్ధి సాధిస్తేనే ఏ దేశమైనా అభివృద్ధి చెందుతుందని ఆమె అన్నారు. స్వయంసమృద్థిలో ఈ రాష్ట్ర మహిళలకు దేశంలోనే కాదు ప్రపంచంలోనే ఎవరూ సాటిరారని, మీరంతా ప్రపంచానికే ఆదర్శమని సోనియా అన్నారు. ఇక్కడి మహిళల ఆత్మవిశ్వాసం చూస్తుంటే తనకు ఎంతో సంతోషం కలుగుతుంటుందని సోనియా అన్నారు.

మహిళలకు పెన్షన్‌ ఇవ్వాలనే ఆలోచనే ఎంతో గొప్పదని ఇలాంటి ఆలోచన చేసిన రాష్ట్ర ప్రభుత్వాన్ని తాను అభినందిస్తున్నానని ఆమె అన్నారు. మహిళలపై ఇక్కడి ప్రభుత్వ ఆదరణ అపూర్వమని అన్నారు. అనంతరం ఆమె పలువురు మహిళలకు బీమా పత్రాలు అందజేశారు. వారి అనుభవాలు, స్పందన విన్నారు. వారితో కలిసి ఫోటోలు దిగారు. అనంతరం కంది బయలుదేరి వెళ్లారు.