భుట్టో హత్యలో నా పాత్ర లేదు: ముషార్రఫ్

ఇస్లామాబాద్: మాజీ ప్రధాని బెనజీర్ భుట్టో హత్యలో తన ప్రమేయం ఉన్నట్లు వచ్చిన ఆరోపణలను పాకిస్తాన్ మాజీ అధ్యక్షుడు పర్వేజ్ ముషార్రఫ్ ఖండించారు. లండన్ లో జరిగిన ఒక కార్యక్రమంలో ఆయన మాట్లాడారు. భుట్టోకు సరైన భద్రత కల్పించలేదనే ఆరోపణల్లో నిజం లేదని ఆయన అన్నట్లు జియో టీవీ తెలిపింది.

ఐక్య రాజ్య సమితి వేసిన సంస్థ భుట్టో హత్యపై జరుపుతున్న దర్యాప్తులో నిజం వెల్లడవుతుందని ఆయన అన్నారు. భుట్టో హత్యకు పాకిస్తానీ తాలిబాన్ నాయకుడు బైతుల్లా కారణమని అప్పటి ముషార్రఫ్ ప్రభుత్వం దర్యాప్తులో ఆరోపించింది. భుట్టో మద్దతుదారులు ఆ దర్యాప్తును నిరాకరించి ఐక్యరాజ్య సమితి దర్యాప్తునకు విజ్ఞప్తి చేశారు. ఈ దర్యాప్తు ఇటీవలే ప్రారంభమైంది.