ఈలేశ్‌ ను వరించిన రాఖీ

న్యూఢిల్లీ: సంచలనాల రాఖీ సావంత్‌ 'ఆధునిక స్వయంవరం' ముగిసింది. కెనడాకు చెందిన ప్రవాస భారతీయుడు ఈలేశ్‌ పరూజన్‌ వాలాను తన వరుడిగా ఎంచుకుంది. నెలరోజులపాటు సాగిన 'రాఖీకా స్వయంవర్‌' కార్యక్రమంలో తుదిఘట్టం ఆదివారం రాత్రి జరిగింది.ఈ పోటీలో 16 మంది పాల్గొనగా మానస్‌ కత్యాల్‌, చిత్తీస్‌ జైన్‌, ఈలేశ్‌ ఫైనల్స్‌కు చేరుకున్నారు. వీరు ముగ్గురూ పెళ్లికుమారులుగా ముస్తాబై వేదికపై వరుసగా నిల్చున్నారు. కొత్త పెళ్లికూతురిగా మారిన రాఖీ... వరమాల చేతిలో పట్టుకుని సిగ్గులొలకబోస్తూ వారి ముందు నడిచింది. ముందు మానస్‌ ను దాటింది.

తర్వాత చిత్తీస్‌ ను దాటుకుని వెళ్లింది. మిగిలింది, ఈలేశ్‌! ఆయన మెడలోనే రాఖీ వరమాల పడింది. ఆ క్షణం అక్కడ హర్షధ్వానాలు మిన్నంటాయి. ఆహూతులంతా రాఖీ, ఈలేశ్‌ ల జంటపై పూలవర్షం కురిపించారు. ఆ తర్వాత ఇద్దరూ దండలు మార్చుకున్నారు. ఉంగరాలూ మార్చుకున్నారు. ఫైనల్స్‌లో 'ఓడిపోయిన' మానస్‌, కత్యాల్‌ సైతం ఈ జంటను అభినందించారు. ఈ పోటీలో విజేతను తాను వెంటనే వివాహం చేసుకోనని రాఖీ ఇదివరకే తెలిపారు.