రజనీకాంత్ కు ఎల్టీటిఇ డబ్బులు: లంక

కొలంబో: తమిళ సూపర్ స్టార్ రజనీకాంత్ చిత్రాల నిర్మాణానికి లిబరేషన్ టైగర్స్ ఆఫ్ తమిళ ఈలం (ఎల్టీటిఇ) నుంచి డబ్బులు అందాయని శ్రీలంక మంత్రి అబ్దుల్ రిషాద్ బతియుద్దీన్ గురువారం ఆరోపించారు. డబ్బులను నేరుగా ఎల్టీటిఇ పంపిందని ఆయన ఒక ప్రమఖ పత్రికతో చెప్పారు. లండన్ లో ఉంటున్న తమిళం వ్యక్తికి లక్షలాది అమెరికా డాలర్లు పంపారని, ఆ డబ్బులతో రజనీకాంత్ తో సినిమాలు నిర్మించాలని ఎల్టీటిఇ నాయకులు సూచించారని ఆయన అన్నారు.

ఎంత డబ్బు పంపారనే విషయాన్ని మంత్రి వివరించలేదు. అయితే భారీగా డబ్బులు పంపించారని మాత్రం ఆయన చెప్పారు. మంత్రి జాబితాలో పలువురు తమిళనాడు రాజకీయ నాయకుల పేర్లు కూడా ఉన్నాయి. ఎండిఎంకె నేత వి గోపాలస్వామి, పిఎంకె నేత రాందాస్, తమిళ నేషనలిస్టు మూవ్ మెంట్ నాయకుడు పి నెడుమారన్, తమిళ ఈలం మద్దతుదారుల సమన్వయ కమిటీ నాయకులు ఆయన జాబితాలో ఉన్నారు. శ్రీలంక మంత్రి ఆరోపణపై రజనీకాంత్ నుంచి ఎటువంటి ప్రతిస్పందన లేదు. ఎండీరాన్ సినిమా షూటింగ్ లో ఆయన బిజీగా ఉన్నారు.