శశి థరూర్ కు సోనియా క్లాస్

న్యూఢిల్లీ: కేంద్ర సహాయ మంత్రి శశి థరూర్ కు కాంగ్రెసు అధ్యక్షురాలు సోనియా గాంధీ క్లాస్ తీసుకున్నారు. ఇక వివాదాల జోలికి వెళ్లవద్దని ఆమె థరూర్ కు సూచించారు. తాను చేసిన క్యాటిల్ క్లాస్ వ్యాఖ్యలపై వివరణ ఇచ్చేందుకు ఆయన మంగళవారం సోనియాను కలిశారు. వివాదం చెలరేగిన సమయంలో ఆయన లైబేరియా, ఘనా పర్యటనల్లో ఉన్నారు. ఇక్కడికి చేరుకున్న వెంటనే ఆయన సోనియాను కలుసుకున్నారు.

సోనియాతో ఆయన 20 నిమిషాల పాటు భేటీ అయ్యారు. ఆ తర్వాత మీడియా ప్రతినిధుల ప్రశ్నలకు స్పందించకుండా వెళ్లిపోయారు. ఆ తర్వాత ఆయన కేంద్ర ఆర్థిక మంత్రి ప్రణబ్ ముఖర్జీని కలుసుకున్నారు. క్యాటిల్ క్లాస్ వ్యాఖ్యలు చేసినందుకు థరూర్ మంత్రి పదవికి రాజీనామా చేయాలని కాంగ్రెసు నాయకుల నుంచే డిమాండ్లు వచ్చాయి. దీంతో తీవ్ర వివాదం చెలరేగింది.