హర్షకుమార్ తప్పు లేదు: మాణిక్య

హైదరాబాద్: తమ కాంగ్రెసు పార్టీ పార్లమెంటు సభ్యుడు హర్షకుమార్ చేసిన ప్రకటనలో తప్పేమీ లేదని విద్యా శాఖ మంత్రి డొక్కా మాణిక్య వరప్రసాద్ అన్నారు. వైయస్ జగన్ ను ముఖ్యమంత్రిని చేయాలనే ఉద్దేశంతోనే హర్షకుమార్ ఆ విధంగా మాట్లాడి ఉంటారని ఆయన శనివారం మీడియా ప్రతినిధుల సమావేశంలో అన్నారు. ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్ టెలీ కాన్ఫరెన్స్ లను అడ్డుకోవడం మంత్రులు, శాసనసభ్యుల ప్రమేయం లేదని ఆయన స్పష్టం చేశారు. జగన్ ను ముఖ్యమంత్రిని చేయాలని కోరుకుంటున్న పార్టీ కార్యకర్తలే స్వచ్ఛందంగా ఆ పనికి పూనుకున్నారని ఆయన చెప్పారు. తమ అభిప్రాయాలను పార్టీ అధిష్ఠానానికి చెప్పుకోకుండా ఎవరికి చెప్పుకుంటామని ఆయన ప్రశ్నించారు.

దివంగత ముఖ్యమంత్రి వైయస్ రాజశేఖర రెడ్డి చేపట్టిన అభివృద్ధి, సంక్షేమ పథకాలను పాఠ్యాంశాల్లో చేరుస్తామని ఆయన చెప్పారు. అక్టోబర్ 2వ వారంలో వైయస్ జీవిత చరిత్ర పుస్తకాన్ని ముఖ్యమంత్రి కె. రోశయ్య, వైయస్ జగన్మోహన్ రెడ్డి సమక్షంలో విడుదల చేస్తామని ఆయన చెప్పారు.