రోశయ్య పని బాగుంది: జయసుధ

నిజామాబాద్‌: వైయస్ కుటుంబానికి వీర విధేయురాలైన సికింద్రాబాద్ ఎమ్మెల్యే జయసుధ మాటమార్చారు. వైయస్‌ జగన్‌ విషయంలో సోనియాగాంధీ నిర్ణయానికి కట్టుబడి ఉంటామని జయసుధ చెప్పారు. ఒక కార్యక్రమంలో పాల్గొనేందుకు నిజామాబాద్‌ వచ్చిన ఆమె విలేకరులతో మాట్లాడారు. జగన్‌ను ముఖ్యమంత్రిని చేయకుంటే అవసరమైతే ఎమ్మెల్యే పదవికి రాజీనామా చేస్తానని ఇటీవల ప్రకటించిన ఆమె తాజాగా మాటమార్చారు.

జగన్‌ సోనియాను కలిసొచ్చిన తర్వాత మీడియాతో మాట్లాడారని, ఇప్పుడు తాను స్పందించటం బాగుండదని అన్నారు. ముఖ్యమంత్రిగా రోశయ్య పనితీరు బాగుందని కితాబిచ్చారు. సినీనటులు రాజకీయాల్లోకి రావటం అలవాటైపోయిందని, ప్రజలకు వారి మొహాలు చూసి బోర్‌ కొడుతోందని జయసుధ వ్యాఖ్యానించారు. అంతమాత్రాన సినీనటులు రాజకీయాల్లో రాణించరనుకోవటం సరైంది కాదన్నారు. అందుకు తన విజయమే నిదర్శనమన్నారు.