నేపాల్ రాజకీయాల్లో చేరుతా: మనీషా

న్యూఢిల్లీ: బాలీవుడ్ నటి, బొంబాయి సినిమా ఫేమ్ మనీషా కొయిరాల నేపాల్ రాజకీయాల్లో చేరబోతోంది. తాను నేపాలీ రాజకీయాల్లో చేరుతున్నట్లు ఆమె మంగళవారం చెప్పారు. పని మీద ఆమె ఈ నెల 5వ తేదీన లాస్ ఏంజెల్స్ వెళ్తున్నారు. ఇటీవల తాను ఖాట్మండ్ వెళ్లినప్పుడు సామాజిక, రాజకీయ పరిస్థితిపై తాజా ఆలోచనలు కలిగాయని ఆమె అన్నారు.

ఆమె ఎన్నికల్లో స్వతంత్ర అభ్యర్థిగా పోటీ చేస్తారా, తన కుటుంబ సభ్యులున్న నేపాలీ కాంగ్రెసు పార్టీలో చేరుతారా అనేది తెలియడం లేదు. అయితే రాజకీయాల్లో చేరే విషయంపై పట్టింపుతోనే ఉన్నారు. తాను ముంబైలో రెండు సినిమాలను పూర్తి చేయాల్సి ఉందని ఆమె చెప్పారు. రాజకీయాల్లో చేరాలనే ఆలోచన ఇంకా మొలక దశలోనే ఉందని ఆమె అన్నారు. తాను రాజకీయాల్లో చేరితే తన స్వదేశంలో ఎక్కువ కాలం గడపాల్సి ఉంటుందని ఆమె చెప్పారు. రాజకీయాల్లో పనిచేస్తూనే సినీ రంగంతో ఏదో విధమైన పాత్రను పోషించాలనే ఆలోచనతో కూడా ఉన్నారు.