కాంగ్రెసును మట్టి కరిపిస్తాం: బాబు

హైదరాబాద్: గ్రేటర్ హైదరాబాద్ ఎన్నికల్లో కాంగ్రెసు పార్టీని, ఇతర పార్టీలను తమ పార్టీ మట్టి కరిపిస్తుందని తెలుగుదేశం పార్టీ అధ్యక్షుడు నారా చంద్రబాబు నాయుడు ధీమా వ్యక్తం చేశారు. ఆయన బుధవారంనాడు గ్రేటర్ హైదరాబాద్ ఎన్నికల ప్రచార భేరీని మోగించారు. కాంగ్రెసును ఓడించడమే ధ్యేయంగా కార్యకర్తలు కృషి చేయాలని ఆయన సూచించారు. ఆయన అభ్యర్థుల చేత ప్రమాణం చేయించారు. తమ పార్టీకి కార్యకర్తల బలం ఉందని, కార్యకర్తల ఉత్సాహం చూస్తుంటే తమ పార్టీ గెలిచి తీరుతుందనే నమ్మకం కలుగుతోందని ఆయన అన్నారు. గ్రేటర్ హైదరాబాద్ ఎన్నికల్లో తమ పార్టీ గెలిచి తీరుతుందని ఆయన అన్నారు.

హైదరాబాద్ తమ పార్టీకి కంచుకోట అని, కులమతాలకు అతీతంగా ప్రజలు తమ పార్టీని బలపరుస్తామని ఆయన అన్నారు. మత ఉద్రిక్తతలో అట్టుడికే హైదరాబాద్ లో ప్రశాంత వాతావరణం నెలకొనేలా చేసింది తమ పార్టీయేనని ఆయన అన్నారు. కాంగ్రెసు మజ్లీస్ తో లోపాయికారి పొత్తు పెట్టుకుందని, ఆ పొత్తు తమ పార్టీని ఏమీ చేయలేదని ఆయన అన్నారు. పొత్తుతో గెలుస్తామని కాంగ్రెసు, మజ్లీస్ కలలు కంటున్నాయని ఆయన అన్నారు. హైదరాబాద్ అభివృద్ధి అంతా తమ ప్రభుత్వ హయాంలోనే జరిగిందని ఆయన చెప్పారు. తమ ప్రభుత్వ హయాంలో చేపట్టిన వివిధ కార్యక్రమాలను ఆయన వివరించారు.