గ్రేటర్ లో వారితి తగని జవాబిస్తాం: చిరంజీవి

హైదరాబాద్: గ్రేటర్ హైదరాబాద్ ఎన్నికల్లో కాంగ్రెసు, తెలుగుదేశం పార్టీలకు తగిన సమాధానం చెప్తామని ప్రజారాజ్యం పార్టీ అధినేత చిరంజీవి అన్నారు. ఆ రెండు పార్టీల తమ పార్టీని అడ్డు తొలగించుకోవాలని చూస్తున్నాయని, అందుకు ఆ పార్టీలకు తగిన సమాధానం చెప్తామని ఆయన అన్నారు. గ్రేటర్ హైదరాబాద్ ఎన్నికల్లో పోటీ చేస్తున్న తమ పార్టీకి చెందిన 64 మంది అభ్యర్థులతో ఆయన బుధవారం ప్రతిజ్ఞ చేయించారు. ఈ సందర్భంగా ఆయన మాట్లాడారు.

తమ పార్టీ మూల సిద్ధాంతమైన సామాజిక న్యాయాన్ని గ్రేటర్ హైదరాబాద్ ఎన్నికల్లో అమలు చేసి చూపామని ఆయన చెప్పారు. తాము 64 డివిజన్లకు పోటీ చేస్తుండగా 40 స్థానాల్లో బీసీలను పోటీకి దించుతున్నామని ఆయన చెప్పారు. ఈ పది రోజుల పాటు ఇంటింటికీ తిరిగి విజయం సాధించేలా కృషి చేయాలని ఆయన అభ్యర్థులకు సూచించారు. నగర సమస్యలతో పాటు డివిజన్ల వారీగా సమస్యలను ప్రస్తావిస్తూ వాటిని తాము ఏ విధంగా పరిష్కరిస్తామో ప్రజలకు వివరించాలని కూడా ఆయన సూచించారు. గ్రేటర్ హైదరాబాద్ ఎన్నికల్లో చిరంజీవి కూడా ప్రచారం చేయనున్నారు.