మహారాష్ట్ర, గుజరాత్ లకు తుఫాను

ముంబై: ఉత్తర మహారాష్ట, దక్షిణ గుజరాత్ ల్లో తుఫాను ముప్పు పొంచి ఉంది. అరేబియా సముద్రం తుఫానుతో అల్లకల్లోలంగా మారింది. ఇది మరింత ఉధృతం కావచ్చునని వాతావరణ శాఖ హెచ్చరించింది. ఫియాన్ గా పిలుస్తున్న తుఫాను అరేబియా సముద్రంలో గురువారం మధ్యాహ్నం రెండున్నర గంటలకు గోవాకు పశ్చిమంగా కేంద్రీకృతమై ఉంది. వాతావరణ శాఖ ఆరెంజ్ అలర్ట్ ను ప్రకటించింది. ముందు జాగ్రత్త చర్యగా మహారాష్ట్రలోని పాఠశాలకు సెలవు ప్రకటించారు. 9 సహాయక బృందాలు కోస్తా తీరానికి తరలి వెళ్లాయి. అత్యవసర సర్వీసులను మహారాష్ట్ర ముఖ్యమంత్రి అశోక్ సింగ్ చౌహాన్ అప్రమత్తం చేశారు. ముంబైలో వర్షాలు కురుస్తున్నాయి. దీంతో ముంబై విమానాశ్రయం నుంచి విమానాల రాకపోకల్లో తీవ్ర జాప్యం జరుగుతోంది.

మహారాష్ట్రలోని లోతట్టు ప్రాంతాల ప్రజలను సురక్షిత ప్రాంతాలకు తరలించే ప్రయత్నం జరుగుతోంది. మహారాష్ట్రలో ప్రభుత్వ కార్యాలయాలను మధ్యాహ్నం రెండు గంటలకే మూసేశారు. మహారాష్ట్రలోనే కాకుండా గుజరాత్, గోవాల్లో వర్షాలు కురుస్తున్నాయి. గుజరాత్ లోని సూరత్ పై తుఫాను ప్రభావం పడే అవకాశం ఉంది. థానే, సిందుదుర్గ్, రత్నగిరి, రాయగడ్, గ్రేటర్ ముంబైలకు తుఫాను ముప్పు పొంచి ఉంది.