మధు కొడా స్కామ్ లో బాలీవుడ్ తారలు?

ముంబై: జార్ఖండ్ మాజీ ముఖ్యమంత్రి మధు కొడా కుంభకోణంలో ఇద్దరు బాలీవుడ్ తారల పాత్ర ఉన్నట్లు ఎన్ ఫోర్స్ డైరెక్టరేట్ అనుమానిస్తోంది. ఇందుకు సంబంధించిన సమాచారం సేకరించడానికి ఆ డైరెక్టరేట్ అధికారులు ముంబై చేరుకున్నట్లు సమాచారం. కొడా సన్నిహిత సహచరుడు వికాస్ సిన్హా ఇచ్చిన సమాచారం మేరకు ఎన్ ఫోర్స్ మెంట్ అధికారులు కంపెనీ పత్రాలను సేకరించడానికి ముంబై వచ్చారు. దర్యాప్తు అధికారులు మంగళవారం కొడా నివాసంలో రోజంతా ఆయనను ప్రశ్నిస్తూ గడిపారు. ఆదాయం పన్ను శాఖ అధికారులు వికాస్ ను ఈ నెల 6వ తేదీన అరెస్టు చేశారు. అతని ఆరోగ్యం బాగా లేకపోవడంతో మంగళవారం వైద్య పరీక్షలు జరిపించి విశ్రాంతి తీసుకోవాల్సిందిగా సూచించారు.

కొడాను ఎన్ ఫోర్స్ మెంట్ అధికారులు ప్రశ్నిస్తున్నారు. మంగళవారంనాడు కూడా ఆయనను విచారించారు. అయితే కొడా దర్యాప్తునకు సహకరించడం లేదని అధికారులు అంటున్నారు. అతని నివాసంలో లభించిన ఆధారాలను బట్టి తాము అతన్ని విచారిస్తున్నామని, తమ దర్యాప్తు సరైన దిశలో సాగుతోందని అధికారులంటున్నారు. కొడా వాంగ్మూలం ఇస్తున్నాడని, అది సరిగా ఉంటే దర్యాప్తు త్వరగా ముగుస్తుందని చెబుతున్నారు.