జగన్ ను సిఎం చేయాల్సిందే: కొండా సురేఖ

హైదరాబాద్: రాష్ట్రంలో 2014లో కాంగ్రెసు అధికారంలోకి రావాలంటే కడప పార్లమెంటు సభ్యుడు వైయస్ జగన్ ను ముఖ్యమంత్రిని చేయాల్సిందేనని మంత్రి పదవికి రాజీనామా చేసిన కాంగ్రెసు నాయకురాలు కొండా సురేఖ అన్నారు. మంత్రి పదవికి రాజీనామా చేసిన తర్వాత ఆమె తొలిసారి బుధవారం వరంగల్ జిల్లాకు వచ్చారు. సురేఖకు వరంగల్ జిల్లా పెంబర్తిలో కార్యకర్తలు స్వాగతం పలికారు. తన భవిష్యత్తును కాలమే నిర్ణయిస్తుందని ఆమె ఈ సందర్భంగా మీడియా ప్రతినిధులతో అన్నారు. తాను ప్రత్యేకంగా చేసే పోరాటం ఏమీ లేదని, దివంగత నేత వైయస్ రాజశేఖర రెడ్డి ఆశయాలను ముందుకు తీసుకుని పోవడమే తన పని అని ఆమె అన్నారు.

తాను మంత్రి పదవికి రాజీనామా చేయడం త్యాగం కాదని, తమను ఈ స్థాయికి తెచ్చిన దివంగత నేత వైయస్ రాజశేఖర రెడ్డికి ఇచ్చిన నివాళి మాత్రమేనని ఆమె అన్నారు. ప్రజల అభీష్టాన్ని తెలిపేందుకు మాత్రమే తాను రాజీనామా చేశానని, తన రాజీనామా ముఖ్యమంత్రి రోశయ్యపై ధిక్కారం కాదని ఆమె స్పష్టం చేశారు.