తలుచుకుంటే కెసిఆర్ ఇల్లు ఖాళీ చేయిస్తా: తలసాని

హైదరాబాద్: తాను తలుచుకుంటే తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు ఇల్లు ఖాళీ చేయిస్తానని తెలుగుదేశం పార్టీ సీనియర్ నాయకుడు తలసాని శ్రీనివాస యాదవ్ వ్యాఖ్యానించారు. సికింద్రాబాదులోని ఇంపీరియల్ గార్డెన్స్ లో జరిగిన పార్టీ కార్యకర్తల విస్తృత స్థాయి సమావేశంలో ఆయన బుధవారం మాట్లాడారు. హైదరాబాద్ నాది అంటున్న కెసిఆర్ గ్రేటర్ హైదరాబాద్ ఎన్నికల్లో ఎందుకు పోటీ చేయడం లేదని ఆయన ప్రశ్నించారు.

ఎన్నికల సమరం నుంచి పారిపోయిన కెసిఆర్ కు హైదరాబాద్ గురించి మాట్లాడే హక్కు లేదని ఆయన అన్నారు. ఎన్నికల్లో పోటీ చేసి బలం నిరూపించుకుంటే హైదరాబాద్ మీది అని అనుకునేవాళ్లమని ఆయన అన్నారు. కాగా, తలసాని శ్రీనివాస్ యాదవ్ వ్యాఖ్యలపై తెరాస మాజీ శాసనసభ్యుడు దొమ్మాట రామలింగారెడ్డి తీవ్రంగా ధ్వజమెత్తారు. తలసాని తన స్థాయిని మరిచిపోయి మాట్లాడుతున్నారని ఆయన అన్నారు. సిద్ధిపేటలో మహిళలు తలసాని శ్రీనివాస యాదవ్ ను తరిమి కొట్టారని, ఆ విషయాన్ని తలసాని గుర్తు చేసుకోవాలని ఆయన అన్నారు.