అదుర్స్ ను అడ్డుకుంటే వస్తుందా: తలసాని శ్రీనివాస యాదవ్

హైదరాబాద్: జూనియర్ ఎన్టీఆర్ నటించిన అదుర్స్ సినిమా ప్రదర్సనను అడ్డుకుంటే తెలంగాణ రాష్ట్ర వస్తుందా అని తెలుగుదేశం నాయకుడు తలసాని శ్రీనివాస యాదవ్ ప్రశ్నించారు. అదుర్స్ సినిమా ప్రదర్శనను అడ్డుకోవడానికి ఆయన బుధవారం మీడియా ప్రతినిధుల సమావేశంలో ఖండించారు. తెలంగాణ రాష్ట్ర సమితి (తెరాస) తీరు వల్ల హైదరాబాదులో సినిమా పరిశ్రమ అభద్రతా భావానికి గురవుతోందని ఆయన అన్నారు. సినిమాలపై, థియేటర్లపై ఆధారపడిన లక్షలాది మంది తెరాస చర్యల వల్ల రోడ్డున పడుతారని ఆయన అన్నారు.

తెలంగాణ అనేది తెరాస అధ్యక్షుడు కె. చంద్రశేఖర రావు వ్యక్తిగత వ్యవహారం కాదని, నాలుగు కోట్ల ప్రజల ఆకాంక్ష అని ఆయన అన్నారు. ప్రాంతీయ విద్వేషాలు రెచ్చగొట్టడం సరి కాదని ఆయన అన్నారు. హైదరాబాదు ప్రజలు వ్యాపారులు, సినిమావాళ్లు అందరూ కావాలని కోరుకుంటున్నారని ఆయన అన్నారు. తెలంగాణకు అనుకూలంగా ఎవరినైనా ఒప్పించాల్సి ఉంటుందని, బలవంత పెట్టి ఒత్తిడి తేవడం సరి కాదని ఆయన అన్నారు.