అతని ఆస్తుల విలువ రెండు కోట్లపైనే

హైదరాబాద్: విజయవాడ నీటిపారుదుల శాఖ ఎగ్జిక్యూటివ్ ఇంజినీర్ (ఇఇ) మెండు వెంకటేశ్వర రావు ఇళ్లపై శనివారం అవినీతి నిరోధక శాఖ (ఎసిబి) అధికారులు దాడులు నిర్వహించారు. హైదరాబాదులోని, చీరాలలోని ఆయన, ఆయన బంధువుల ఇళ్లలో సోదాలు నిర్వహించారు. ఆదాయానికి మించి ఆస్తులు కూడబెట్టాడనే ఆరోపణలు రావడంతో ఎసిబి అధికారులు ఈ దాడులు నిర్వహించారు. అతనికి రెండు కోట్ల రూపాయలకు పైగా ఆస్తులున్నట్లు ఈ సోదాల్లో బయటపడింది.

హైదరాబాదు, చీరాలల్లోనే కాకుండా గుంటూరు, విజయవాడ, ఒంగోలుల్లో ఆయన ఆస్తులున్నట్లు ఎసిబి సోదాల్లో తేలింది. సోదాల్లో బయటపడిన బంగారం, వెండి ఆభరణాలను లెక్కించాల్సి ఉంది. ఇటీవలి కాలంలో అవినీతి అధికారులపై ఎసిబి అధికారులు దాడులను ముమ్మరం చేశారు.