హైదరాబాద్ లో బాడీ బిల్డర్ హత్య

హైదరాబాద్: ప్రాగా టూల్స్‌ కంపెనీ ఉద్యోగిని డంబెల్‌తో మోది దారుణంగా హత్య చేశారు. ఈ సంఘటన మల్కాజిగిరి పోలీస్‌స్టేషన్‌ పరిధిలో శనివారం జరిగింది. పోలీసుల కథనం ప్రకారం వివరాలిలా ఉన్నాయి. ప్రాగా టూల్స్‌ కంపెనీలో పనిచేసే బి.వినోద్‌కుమార్‌ (50) హనుమాన్‌పేటలోని రోడ్డు నెంబర్‌ 3లో ఉన్న సుజనమ్మ ఇంట్లో ఐదు నెలలుగా అద్దెకు ఉంటున్నాడు. శనివారం రెండవ షిఫ్ట్‌ డ్యూటీకి వెళ్లాల్సిన ఈయన వెళ్లలేదు. అనుమానం వచ్చిన ఇంటి యజమాని తన కుమారుడు జాన్సన్‌ను వినోద్‌కుమార్‌ రూమ్‌ వద్దకు వెళ్లి చూడమని చెప్పింది. దగ్గరగా వేసివున్న తలుపులు తెరిచి చూడగా మంచం మీద వినోద్‌కుమార్‌ విగతజీవుడై కనిపించాడు. సమాచారం అందుకున్న మల్కాజిగిరి సబ్‌ డివిజన్‌ ఏసీపీ పద్మజారెడ్డి, ఎస్‌హెచ్‌ఓ రమేష్‌ సంఘటన స్థలానికి వచ్చి పరిశీలించారు. మృతుడి తల కుడి వైపు బలమైన గాయం ఉన్నట్లు గుర్తించారు. సంఘటన స్థలంలో మద్యం తాగి పడేసిన గ్లాసులు ఉన్నాయి. వినోద్ కుమార్ బాడీ బిల్డర్ కూడా.

వినోద్‌కుమార్‌ హత్యకు కుటుంబ కలహాలే కారణమని పోలీసులు అనుమానిస్తున్నారు. వినోద్‌కు ఇద్దరు భార్యలు. మొదటి భార్యకు విడాకులు ఇచ్చాడు. రెండో భార్య విజయలకి కూడా ఇతనిపై విడాకుల కేసు వేసింది. ప్రస్తుతం కోర్టులో కేసు విచారణలో ఉంది. డాగ్‌స్క్వాడ్‌ వినోద్‌ గదిలోని అల్మరాలో దాచిన డంబెల్‌ను గుర్తించింది. దానికి రక్తపు మరకలు అంటి ఉండటంతో వినోద్‌కుమార్‌ తల మీద దానితోనే మోది దుండగులు హత్య చేసి ఉంటారని పోలీసులు భావిస్తున్నారు. మృతుడి ఇంటి నుంచి బయటకు వచ్చిన శునకం ప్రధాన రహదారి వద్ద ఉన్న ఆటో స్టాండ్‌ వరకు వచ్చి ఆగిపోయింది.

వినోద్‌కుమార్‌ మద్యం మత్తులో ఉండగా తెలిసిన వారే హత్య చేసి ఉంటారనే నిర్ధారణకు వస్తున్నారు. హత్తున్ని సుజనమ్మ శనివారం రాత్రి చూచినట్లు పోలీసులకు చెప్పింది. మల్కాజిగిరి పోలీసులు కేసు నమోదు చేసుకొని దర్యాప్తు చేస్తున్నారు.