జాన్ తో పెళ్లి అవసరమనుకోవడం లేదు: బిపాసా

న్యూఢిల్లీ: జాన్ తో పెళ్లి అవసరమని తాను భావించడం లేదని బాలీవుడ్ తార బిపాసా బసు అంటోంది. జాన్ అబ్రహం, బిపాసా బసుల మధ్య సంబంధం లోకానికంతా తెలిసిందే. వివాహ వ్యవస్థపై తనకు పూర్తి నమ్మకం ఉందని, అయితే జాన్ తో సంబంధం దాన్ని పూర్తి చేస్తున్నప్పుడు అది అవసరమని అనుకోవడం లేదని ఆమె అన్నది.

విహహం చేసుకునే ప్రణాళిక లేదని, పెళ్లి చేసుకోవాలనే ఒత్తిడి కూడా లేదని, ఇప్పుడే పెళ్లి చేసుకోవాలనే ఆలోచన తమకు లేదని ఆమె మీడియా ప్రతినిధులతో చెప్పింది. సమయం వచ్చినప్పుడు జరగాల్సింది జరుగుతుందని, అందుకు సమయం వచ్చిందని తాను అనుకోవడం లేదని బిపాసా బసు అన్నది.

తాము ఒకే రకంగా ఉన్నామని, జీవితంలో తమ భావనలు కూడా ఒక్కటేనని, తమ పునాదులు, కుటుంబ విలువలు కూడా ఒక్కటేనని, తమ కుటుంబాల నుంచి తమకు మద్దతు లభిస్తోందని ఆమె చెప్పింది.