ఈల వేసిన యువకుడిపై చిరు ఆగ్రహం

సామర్లకోట: తనను చూసి ఈల వేసినందుకు ఓ యువకుడు తన అభిమాన నటుడు, ప్రజారాజ్యం అధ్యక్షుడు చిరంజీవి నుంచి ఆగ్రహం చవి చూడాల్సి వచ్చింది. ఈల వేసిన యువకుడిపై ఆయన చిర్రుబుర్రులాడారు. వేదిక మీదికి పిలిచి నీ ప్రవర్తన బాగా లేదంటూ చీవాట్లు పెట్టారు. దాంతో ఆ యువకుడు నీరు గారిపోయాడు. అప్పటికే సగం నీరసపడిన ఆ యువకుడి చేత క్షమాపణ చెప్పించారు. తల మీద మొట్టికాయ వేసి పంపించారు. తూర్పు గోదావరి జిల్లా సామర్లకోట నియోజకవర్గంలో జరిగిన పార్టీ కార్యకర్తల సమావేశంలో ఈ సంఘటన చోటు చేసుకుంది.

పార్టీ సమావేశంలో సీరియస్ గా మాట్లాడుతున్న చిరంజీవికి ఈలల గోల చిరాకు తెప్పించింది. కొద్దిసేపు సహనం పాటించారు. అయితే అల్లరి ఆగకపోవడంతో ఆగ్రహావేశానికి గురయ్యారు. ఈ సమయంలోనే విరామం లేకుండా ఈల వేస్తున్న యువకుడిపై పడింది. వేదిక మీదికి పిలిచి క్లాస్ తీసుకున్నారు. సభ మొత్తానికి క్షమాపణ చెప్పించారు.