చంపేస్తామని జావెద్ అక్తర్ కు బెదిరింపులు

న్యూఢిల్లీ: తనను చంపుతామంటూ బెదిరింపు ఈ మెయిల్స్ వచ్చినట్లు హిందీ సినీ రచయిత జావెద్ అక్తర్ పోలీసులకు ఫిర్యాదు చేశారు. మహిళా ఉద్యోగులపై ఫత్వా విధించడాన్ని వ్యతిరేకించినందుకు తన ప్రాణాలు తీస్తామంటూ ఇస్లామిక్ సెమినరీ దారుల్ ఉలూమ్, దియోబాండ్ సంస్థలు తనకు బెదిరింపు ఈ మెయిల్స్ పంపినట్లు ఆయన పోలీసులకు తెలిపారు.

తనకు కౌంట్ డౌన్ ప్రారంభమైందని లేఖలో తెలిపారని, ఈ వ్యవహారంపై వీలైనంత త్వరలో విచారణ చేపట్టాలని ఆయన పోలీసులకు చెప్పుకున్నారు. ఫత్వాలకు ప్రాముఖ్యం లేదని, సమాజం పట్టించుకోవాల్సిన అవసరం లేదని జావెద్ అన్నారు. పురుషులతో కలిసి పనిచేయడం ఇస్లామికి సంప్రదాయాలకు, షరియాకు విరుద్ధమని ఇస్లామిక్ సంస్థలు ఫత్వా జారీ చేశాయి. దీన్ని జావెద్ అక్తర్ వ్యతిరేకించారు.