మా పార్టీ వారే చంద్రబాబుతో కుమ్మక్కయ్యారు: శ్రీకాంత్ రెడ్డి

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ కు వ్యతిరేకంగా తమ పార్టీకి చెందినవారే తెలుగుదేశం పార్టీ అధ్యక్షుడు నారా చంద్రబాబునాయుడితో కుమ్మక్కయ్యారని జగన్ వర్గానికి చెందిన కాంగ్రెసు శాసనసభ్యులు శ్రీకాంత్ రెడ్డి, రామచంద్రా రెడ్డి వ్యాఖ్యానించారు. అధికార పక్షంలో ఉన్నారా, ప్రతిపక్షంలో ఉన్నారా అని వారు మంగళవారం మీడియా ప్రతినిధుల సమావేశంలో వారిని ప్రశ్నించారు. వైయస్ రాజశేఖర రెడ్డి స్థాయిని తగ్గించడానికి తమ పార్టీవారే కుట్ర చేస్తున్నారని వారు విమర్సించారు. జగన్ మంచి నిర్ణయం తీసుకుంటారని, తాము జగన్ వెంటే ఉంటామని వారు చెప్పారు.

జగన్ పార్టీ పెడతారనే ప్రచారాన్ని వారు ఖండించారు. జగన్ పై విమర్శలు చేస్తున్నవారు టీవీ చానెళ్ల ముందు కాకుండా ప్రజల ముందుకు వచ్చి మాట్లాడాలని వారు సవాల్ విసిరారు. జగన్ పై విమర్శలతో కాంగ్రెసు పార్టీని నాశనం చేసేందుకు ప్రయత్నిస్తున్నారని వారు ఆరోపించారు. జగన్ క్రమశిక్షణ గల కాంగ్రెసు కార్యకర్త అని వారు అన్నారు.