వైయస్ జగన్ కు మరో షాక్: కడప ఎస్పీ మల్లారెడ్డి బదిలీ

హైదరాబాద్: రాష్ట్ర ప్రభుత్వం కడప పార్లమెంటు సభ్యుడు వైయస్ జగన్ కు మరో షాక్ ఇచ్చింది. జగన్ కు సన్నిహితుడైన కడప జిల్లా ఎస్పీ మల్లారెడ్డిని బదిలీ చేసింది. రాష్ట్రంలో ఏడుగురు ఐపీఎస్‌ అధికారులను బదిలీ చేస్తూ ప్రభుత్వం బుధవారం ఉత్తర్వులు జారీ చేసింది. వీరిలో కడప ఎస్పీ మల్లారెడ్డిని అకస్మాత్తుగా హైదరాబాద్‌ ట్రాఫిక్‌ విభాగానికి బదిలీ చేయటం జగన్ కు షాక్ ఇవ్వడమేననే అభిప్రాయం వ్యక్తమవుతోంది. మల్లారెడ్డి వైఎస్‌ రాజశేఖర రెడ్డి కుటుంబానికి సన్నిహితుడిగా భావిస్తున్నారు. గతంలో నెల్లూరు ఎస్పీగా పనిచేసిన మల్లారెడ్డి ఈ ఏడాది ఫిబ్రవరిలో కడపకు బదిలీ అయ్యారు. ఆరు నెలలు తిరగకుండానే ఆయనను అంతగా ప్రాధాన్యం లేని ట్రాఫిక్‌ విభాగానికి బదిలీ చేశారు.

పంజాబ్‌ క్యాడర్‌కు చెంది, మన రాష్ట్రానికి బదిలీపై వచ్చిన తెలుగు అధికారి సీతారామిరెడ్డిని సీఐడీ ఐజీగా నియమించారు. గతంలో హైదరాబాద్‌ పోలీసు కమిషనరేట్‌లో జాయింట్‌ పోలీస్‌ కమిషనర్‌ (స్పెషల్‌ బ్రాంచి)గా పనిచేసిన అమిత్‌గార్గ్‌ ఏడాది పాటు అధ్యయన యాత్ర (స్టడీటూర్‌) నిమిత్తం అమెరికాలో ఉన్నారు. ఇటీవల తిరిగి వచ్చిన ఆయనను నగర సాయుధ విభాగం (సీఏఆర్‌) హెడ్‌ క్వార్టర్స్‌ జాయింట్‌ కమిషనర్‌గా నియమించారు.