మళ్లీ చిరంజీవి సినిమాల్లోకి: త్వరలో షూటింగ్?

హైదరాబాద్: ప్రజారాజ్యం పార్టీ అధ్యక్షుడు, మెగా స్టార్ చిరంజీవి మళ్లీ సినిమాల్లోకి అడుగు పెట్టబోతున్నట్లు టాలీవుడ్ లో ప్రచారం ఊపందుకుంది. తాను నటించబోయే సినిమా గురించి ఆయన ఆదివారం తన జన్మదినం సందర్భంగా నిర్ణయం తీసుకుంటారని చెబుతున్నారు. ఆయన తన జన్మ దిన వేడుకలను ఆర్భాటాలకు, హంగులకు దూరంగా కుటుంబ సభ్యుల మధ్య ఆదివారం జరుపుకుంటున్నారు. ఈ సందర్భంగానే ఆయన తాను సినిమాల్లో తిరిగి నటించే విషయంపై నిర్ణయం తీసుకోవచ్చునని అంటున్నారు. ఆయన ఇప్పటి వరకు 149 చిత్రాల్లో నటించారు. తాను నటించబోయే 150వ చిత్రం అత్యంత విశిష్టమైందై ఉండాలని ఆయన అనుకుంటున్నట్లు చెబుతున్నారు.

చిరంజీవి కోసం ఇప్పటికే స్వాతంత్ర్య సమరయోధుడు ఉయ్యాలవాడ నరసింహారెడ్డి కథ తయారై ఉంది. ఆయన ఆదే సినిమాలో నటిస్తారా, మరేదైనా సాంఘిక చిత్రం ఎన్నుకుంటారా అనేది తెలియడం లేదు. ఎన్నికలకు ఇంకా నాలుగేళ్ల వ్యవధి ఉండడంతో ఈలోగా మరో సినిమా తీయాలనేది ఆయన ఉద్దేశ్యమని చెబుతున్నారు. ఎన్నికలు వచ్చే నాటికి అది సిద్ధంగా ఉండాలని కూడా భావిస్తున్నట్లు చెబుతున్నారు. కాగా, చిరంజీవి నటించబోయే చిత్రానికి ఆయన కుమారుడు రామ్ చరణ్ తేజ నిర్మాతగా వ్యవహరిస్తున్నారు.

చిరంజీవి కుటుంబ సభ్యలకు రెండు నిర్మాణ సంస్థలున్నాయి. అందులో ఒకటి అంజనా ప్రొడక్షన్స్ కాగా, మరోటి నియో ప్రాజెక్ట్స్. రామ్ చరణ్ తేజ నియో ప్రాజెక్ట్స్ కింద చిరంజీవితో సినిమా నిర్మిస్తారని అంటున్నారు. తండ్రి బర్త్ డే కానుకగా దాన్ని ఆయన చేపడతారని అంటున్నారు.