వచ్చే బర్త్ డే కల్లా నాన్న చిరు సినిమా: రామ్ చరణ్

హైదరాబాద్: వచ్చే బర్త్ డేకల్లా నాన్న సినిమా వస్తుందని ప్రజారాజ్యం పార్టీ అధ్యక్షుడు చిరంజీవి కుమారుడు, సినీ హీరో రామ్ చరణ్ తేజ్ ప్రకటించారు. చిరంజీవి బ్లడ్ బ్యాంక్ వద్ద ఆయన చిరంజీవి 55వ బర్త్ డే వేడుకల్లో పాల్గొన్నారు. ఈ సందర్భంగా ఆయన కేక్ కట్ చేశారు. రామ్ చరణ్ ను చూసేందుకు పెద్ద యెత్తున అభిమానులు వచ్చారు. ఈ సందర్భంగా తోపులాట చోటు చేసుకుంది. ఈ తోపులాటలో బ్లడ్ బ్యాంక్ అద్దాలు ధ్వంసమయ్యాయి. నాన్న చిరంజీవి సినిమాల్లో నటిస్తారని, వచ్చే బర్త్ డేకల్లా సినిమా వస్తుందని ఆయన చెప్పారు. అభిమానుల కోరిక మేరకే చిరంజీవి సినిమాల్లో నటించడానికి అంగీకరించారని ఆయన చెప్పారు.

చిరంజీవి నటించబోయే సినిమా ఎలా ఉంటుందనేది ఇప్పుడే చెప్పలేనని ఆయన అన్నారు. నాన్న సినిమాల్లో నటించాలని తాను కోరుకున్నానని ఆయన చెప్పారు. నాన్న సినిమాల్లో నటించాలా, వద్దా అని ఆయన అభిమానులను ప్రశ్నించారు. వారు నటించాలని సమాధానం ఇచ్చారు. దీంతో చిరంజీవి సినిమాల్లో నటించనున్న విషయాన్ని ప్రకటించారు. బ్లడ్ బ్యాంక్ పై వచ్చిన ఆరోపణలు చిరంజీవి ఇమేజ్ ముందు నిలువలేవని ఆయన అన్నారు. రక్తనిధిపై వచ్చిన ఆరోపణలకు అభిమానులే సమాధానం చెప్తారని ఆయన అన్నారు.