వైయస్ జగన్ గురించి అన్నీ తెలుసన్న సోనియా గాంధీ

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ గురించి తనకు అన్ని విషయాలూ తెలుసునని కాంగ్రెసు పార్టీ అధ్యక్షురాలు సోనియా గాంధీ వ్యాఖ్యానించారు. కాంగ్రెసు సీనియర్ శాసనసభ్యుడు పి. శంకరరావు గురువారం పార్లమెంటు సెంట్రల్ హాల్ లో ఆమెను కలిశారు. జగన్ పై చర్య తీసుకోవాలని శంకర రావు సోనియాను కోరారు. దానికి సోనియా ప్రతిస్పందిస్తూ - జగన్ గురించి తనకు అన్ని విషయాలూ తెలుసునని అన్నారు.

సోనియాకు శంకరరావు రెండు పేజీల నివేదిక ఇచ్చారు. అందులో జగన్ పార్టీ వ్యతిరేక కార్యకలాపాలపై ప్రస్తావించారు. జగన్ ప్రవర్తిస్తున్న తీరు బాగా లేదని శంకరరావు విమర్సించారు. జగన్ అందరి పట్ల కూడా దౌర్జన్యపూరితంగా వ్యవహరిస్తున్నారని ఆయన అన్నారు. జగన్ పై పార్టీ అధిష్టానం చర్య గురించి తానేమీ చెప్పలేనని, తగిన సమయంలో జగన్ పై చర్యలు తీసుకోవచ్చునని శంకర రావు అన్నారు. వైయస్ జగన్ అక్రమంగా సంపాదించారని ఆయన ఆరోపించారు. వైయస్ రాజశేఖర రెడ్డి కుటుంబ సభ్యులు పెద్ద యెత్తున ఆస్తులు సంపాదించారని ఆయన అన్నారు.