తెలంగాణపై చంద్రబాబు మరోసారి విషం కక్కారా?

హైదరాబాద్: తెలంగాణ రాష్ట్ర ఏర్పాటుపై తన వ్యతిరేక వైఖరిని తెలుగుదేశం పార్టీ అధ్యక్షుడు నారా చంద్రబాబు నాయుడు మరోసారి బయట పెట్టుకున్నారనే విమర్శలు వస్తున్నాయి. తెలంగాణపై చంద్రబాబు విషం కక్కారని తెలంగాణవాదులు వ్యాఖ్యానిస్తున్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వివిధ కంపెనీల సిఇవోలతో సమావేశం కావడాన్ని వ్యతిరేకిస్తూ చంద్రబాబు కొన్ని వ్యాఖ్యలు చేశారు. 2011లో తెలంగాణ ఏర్పడుతుందని కెసిఆర్ అనడంపై చంద్రబాబు తీవ్ర వ్యాఖ్య చేశారు. కెసిఆర్ పగటి కలలు కంటున్నారని చంద్రబాబు అన్నారు. దీనిపై తెలంగాణ గుండె చప్పుడు రాజ్ న్యూస్ తీవ్రంగా మండిపడుతూ తెలంగాణపై చంద్రబాబు విషం కక్కారని వ్యాఖ్యానించింది.

అలాగే, ఆలు లేదు చూలు లేదు బిడ్డ పేరు సోమలింగం అన్నట్లు కెసిఆర్ వ్యవహరిస్తున్నారంటూ చంద్రబాబు చేసిన వ్యాఖ్యపై కూడా రాజ్ న్యూస్ తీవ్రంగా ప్రతిస్పందించింది. చంద్రబాబు తన తెలంగాణ వ్యతిరేక వైఖరిని మరోసారి బయట పెట్టుకున్నారని తెలంగాణవాదులు వ్యాఖ్యానిస్తున్నారు. తెలంగాణ ప్రజా సంఘాల నేతల అభిప్రాయాలను కూడా రాజ్ న్యూస్ ప్రసారం చేసింది.