వైయస్సార్ పథకాలు ఎన్ని అడ్డంకులొచ్చినా కొనసాగుతాయి: సిఎం

విశాఖపట్నం: ఎన్ని అవాంతరాలు ఎదురైనా దివంగత నేత వైయస్ రాజశేఖర రెడ్డి ప్రవేశపెట్టిన సంక్షేమ పథకాలను కొనసాగిస్తామని ముఖ్యమంత్రి కె. రోశయ్య చెప్పారు. విశాఖపట్నంలో జరిగిన బహిరంగ సభలో ఆయన బుధవారం మాట్లాడారు. అభివృద్ధి, సంక్షేమం ప్రభుత్వానికి రెండు కళ్లలాంటివని, ఏ కన్ను సరిగా పనిచేయకపోయినా నష్టమేనని ఆయన అన్నారు. వైయస్ ఎన్నో ప్రజా సంక్షేమ పథకాలను ప్రవేశపెట్టారని, వాటి అమలుకు ప్రభుత్వం కట్టుబడి ఉందని ఆయన అన్నారు. ఆర్థిక సమస్యలు, ప్రకృతి వైపరీత్యాలు ఎదురైనా వాటిని అమలు చేసి తీరుతామని ఆయన అన్నారు.

సభలో ఆందోళనకు దిగిన భారతీయ జనతా పార్టీ (బిజెపి)పై ఆయన మండిపడ్డారు. బిజెపికి ఒకటో రెండో సీట్లు వస్తాయని, అది పూర్తిగా ఉత్తర భారతానికి చెందిన పార్టీ అని, ఇక్కడ మూడో సీటు కూడా రాదని, ఆ పార్టీవారు వచ్చి సభను అడ్డుకోవడానికి ప్రయత్నించడం సరి కాదని ఆయన అన్నారు. అది సంస్కారం కాదని, తాము వేరే పార్టీవారి సమావేశాలకు వెళ్లి గొడవ చేయబోమని, అది కాంగ్రెసు సంస్కారం కాదని ఆయన అన్నారు. మైక్రో ఫైనాన్స్ ఆగడాలను అరికట్టడానికి ఆర్డినెన్స్ తెచ్చామని, మైక్రోఫైనాన్స్ బాధితులను అన్ని విధాలుగా ఆదుకుంటామని ఆయన చెప్పారు.