ఎమ్మెల్యేలందరూ సంతకాలు చేసినా తెలంగాణ రాదు: ఉండవల్లి

న్యూఢిల్లీ: శాసనసభలో ఉన్న 294 మంది శాసనసభ్యులు సంతకాలు చేసినా తెలంగాణ రాష్ట్రం రాదని రాజమండ్రి పార్లమెంటు సభ్యుడు ఉండవల్లి అరుణ్ కుమార్ బుధవారం న్యూఢిల్లీలో విలేకరుల సమావేశంలో అన్నాడు. తెలంగాణకు రాష్ట్రంలోని శాసనసభ్యులతో సంబంధం లేదన్నారు. పోలవరం ప్రాజెక్టుపై ఆయన విలేకరుల సమావేశం నిర్వహించారు. పోలవరాన్ని నిర్మించాల్సిందేనన్నారు. పోలవరాన్ని ఎంత తొందరగా చేపడితే అంత మంచిదని చెప్పారు. ఈ సందర్భంగా ఆయన తెలంగాణపై స్పందించారు.

ప్రత్యేక తెలంగాణ సాధించాలంటే పార్లమెంటులో బిల్లు ప్రవేశ పెట్టాలని చెప్పారు. బిల్లు ప్రవేశ పెట్టి దాని ఆమోదం కోసం కూడా చాలా ప్రక్రియ ఉంటుందన్నారు. కాంగ్రెస్ పార్టీ ఒక్కటే తెలంగాణను ఆమోదిస్తే సరిపోదన్నారు. కేంద్రంలో కాంగ్రెస్ ప్రభుత్వానికి మద్దతునిస్తున్న అన్ని పార్టీలు కూడా బిల్లుకు మద్దతును ఇస్తేగానీ తెలంగాణ సాధ్యపడదని చెప్పారు.