తెలంగాణపై అధిష్టానం నిర్ణయానికి కట్టుబడి ఉంటా: కిరణ్ కుమార్

హైదరాబాద్‌: తెలంగాణపై తాను తమ కాంగ్రెసు పార్టీ అధిష్టానం నిర్ణయానికి కట్టుబడి ఉంటానని కొత్త ముఖ్యమంత్రి ఎన్. కిరణ్ కుమార్ రెడ్డి చెప్పారు. తాను రాయలసీమకు ప్రాతినిధ్యం వహిస్తున్నా హైదరాబాదువాడినే అని ఆయన చెప్పుకున్నారు. ముఖ్యమంత్రిగా సమస్యల పరిష్కారానికి అందరినీ కలుపుకొని పోతానని కిరణ్‌కుమార్‌ రెడ్డి చెప్పారు. గురువారం రాత్రి ఆయన లేక్‌వ్యూ అతిధి గృహంలో మీడియాతో మాట్లాడారు. తనను ముఖ్యమంత్రిగా నియమించినందుకు సోనియాగాంధీకి కృతజ్ఞతలు తెలి పారు. సమస్యల పరిష్కారానికి ప్రతిపక్షాల సహకారం కూడా తీసుకుంటానని చెప్పారు.

సమస్యలున్నప్పుడే మరింత కష్టపడి పనిచేయాల్సి ఉంటుందన్నారు. మంత్రివర్గం గురించి ఇప్పుడే మాట్లాడడం సరికాదని, ఢిల్లీ వెళ్ళి అధిష్ఠానంతో మాట్లాడేకే తెలుస్తుందని అన్నారు. కిరణ్‌కు పలువురు మంత్రులు అభినందనలు తెలిపారు. యువకుడైన ఆయన నాయకత్వంలో రాష్ట్రం సర్వతోముఖాభివృద్ధి సాధిస్తుందని దానం నాగేందర్‌ ఆశాభావం వ్యక్తం చేశారు. మధ్యాహ్నమే మంత్రి గల్లా అరుణకుమారి కిరణ్‌ను ఆయన ఇంటివద్ద కలిశారు. కొత్త ముఖ్యమంత్రి సొంత జిల్లా చిత్తూరులో హర్షాతిరేకాలు వ్యక్తమయ్యాయి.