రాజీనామాపై వెనక్కి తగ్గని వట్టి వసంత కుమార్

హైదరాబాద్‌: మంత్రి పదవికి తాను చేసిన రాజీనామాపై వెనక్కి తగ్గడానికి వట్టి వసంత కుమార్ నిరాకరించారు. మంత్రి పదవికి రాజీనామాకు తాను కట్టుబడి ఉన్నట్లు ఆయన గురువారం మీడియాకు ఓ లేఖను విడుదల చేశారు. శాసనసభ్యుడిగా కొనసాగుతానని, కాంగ్రెసు పార్టీలోనే ఉంటానని ఆయన చెప్పారు. తన కుటుంబం ఎల్లవేళలా కాంగ్రెసు పార్టీ పక్షాన్నే నిలిచిందని, ఈ విషయంలో సందేహాలు అవసరం లేదని ఆయన అన్నారు.

త్వరలో తాను తమ కాంగ్రెసు పార్టీ అధ్యక్షురాలు సోనియా గాంధీని కలుస్తానని ఆయన చెప్పారు. సోనియా నిర్ణయానికి తాను కట్టుబడి ఉంటానని, అప్పటి దాకా తాను మంత్రివర్గానికి దూరంగా ఉంటానని ఆయన చెప్పారు. తాను రాజీనామా ఎందుకు చేశానో సోనియా గాంధీకి వివరిస్తానని ఆయన చెప్పారు. శాసనసభా సభ్యత్వానికి కూడా రాజీనామా చేసిన ఆయన అధిష్టానం జోక్యంతో కాస్తా వెనక్కి తగ్గినట్లు తెలుస్తోంది.