రంగంలోకి దిగిన వైయస్ జగన్: వట్టి వసంతకుమార్ కు ఫోన్

హైదరాబాద్‌: మంత్రుల్లో పెల్లుబుకిన అసంతృప్తిని తనకు అనుకూలంగా మార్చుకోవడానికి వైయస్ జగన్ రంగంలోకి దిగారు. అసంతృప్త మంత్రులను తన వైపు తిప్పుకునేందుకు ఆయన ప్రయత్నాలు ప్రారంభించారు. మంత్రి పదవికి, శాసనసభ సభ్యత్వానికి రాజీనామా చేసిన వట్టి వసంత కుమార్ కు వైయస్ జగన్ ఫోన్ చేసినట్లు సమాచారం. వట్టి వసంతకుమార్ ను తన వైపు రావాల్సిందిగా ఆయన కోరినట్లు తెలుస్తోంది.

వైయస్ జగన్ గురువారం ఉదయం పులివెందుల నుంచి హైదరాబాదు చేరుకున్నారు. తన అనుచరులతో ఆయన సమావేశమయ్యారు. భవిష్యత్తు కార్యాచరణపై ఆయన మంతనాలు జరుపుతున్నారు. జగన్ ఇంటి వద్ద సందడి నెలకొంది. ఇదే సమయంలో మంత్రి పదవి తీసుకున్న వైయస్ వివేకానంద రెడ్డి వైయస్ జగన్ ఇంటికి వచ్చారు. వైయస్ జగన్ చిన్నాన్న వైయస్ వివేకానంద రెడ్డితో మాట్లాడుతున్నారు.