ఏదైనా సోనియాను కలిశాకే: పశ్చిమ గోదావరి ఎమ్మెల్యేలతో వట్టి

హైదరాబాద్‌: మంత్రి పదవికి చేసిన రాజీనామా విషయంలో పార్టీ అధ్యక్షురాలు సోనియా గాంధీని కలిసిన తర్వాతనే నిర్ణయం తీసుకుంటానని వట్టి వసంతకుమార్ స్పష్టం చేశారు. ఆయనను శుక్రవారం పశ్చిమ గోదావరి జిల్లా కాంగ్రెసు శాసనసభ్యులు కలిశారు. రాజీనామా ఉపసంహరణకు వట్టి వసంతకుమార్ సానుకూలంగా ప్రతిస్పందించారని భేటీ అనంతరం పశ్చిమ గోదావరి జిల్లా శాసనసభ్యులు మీడియా ప్రతినిధులతో చెప్పారు. సోమవారంలోగా మంత్రిగా వట్టి వసంతకుమార్ బాధ్యతలు స్వీకరిస్తారని, ఈలోగా పార్టీ అధిష్టానాన్ని కలుస్తారని వారన్నారు.

సానుకులంగా స్పందించినట్లు వార్త వచ్చిన వెంటనే వట్టి వసంతకుమార్ స్పందించారు. సోనియా గాంధీని కలిసిన తర్వాతనే తాను రాజీనామా విషయంలో నిర్ణయం తీసుకుంటానని, తాను రాజీనామాను ఉపసంహరించుకోలేదని ఆయన చెప్పారు. తాను సోమవారం ఢిల్లీ వెళ్తున్నట్లు ఆయన తెలిపారు. వట్టి వసంతకుమార్ తో కాంగ్రెసు అధిష్టానం ఆదేశాల మేరకు పార్లమెంటు సభ్యుడు కావూరి సాంబశివ రావు చర్చలు జరిపారు. తాజాగా రాష్ట్ర మంత్రులు కె. జానారెడ్డి, బొత్స సత్యనారాయణ వట్టి వసంతకుమార్ తో సమావేశమయ్యారు.