మీకూ, మాకూ అంటూ తెలంగాణను వేరు చేసిన కిరణ్ కుమార్

హైదరాబాద్: ముఖ్యమంత్రి ఎన్ కిరణ్ కుమార్ రెడ్డి తన తొలి బహిరంగ సభలోనే సీమాంధ్ర లక్షణాన్ని బయటపెట్టుకున్నారు. రంగారెడ్డి జిల్లా తాండూరులో జరిగిన బహిరంగ సభలో ఆదివారం ఆయన తన తెలంగాణను, రాయలసీమను వేరు చేస్తూ మాట్లాడి తన రాయలసీమ లక్షణాన్ని వెల్లడించుకున్నారు. దీనిపై తెలంగాణ గుండె చప్పుడు రాజ్ న్యూస్ తీవ్రంగా ఆగ్రహం వ్యక్తం చేస్తుంది. మీకూ, మాకూ తేడా ఏమిటంటే అని మొదలు పెట్టి మీరు భూములకు ఎకరానికి రెండు కోట్ల రూపాయలు పలుకుతుంటే, మా భూములకు రెండు లక్షల రూపాయలు మాత్రమే పలుకుతోందని ఆయన అన్నారు.

మీరు కంతలు కట్టడం లేదని అనుకున్నారు, కంతులు సరిగా కడితే రుణాలకు సంబంధించిన ఇబ్బింది ఉండదన్నారు. కంతులు అనే పదం స్థానికులకు అర్థం కాలేదని తెలుసుకున్న ఆయన మన భాషలో కిస్తులు అని చెప్పారు. అంటే బ్యాంకు వాయిదాలని అర్థం. తెలంగాణలో నీటి కోసం ఎలా ఇబ్బందులు ఎదుర్కుంటున్నారో రాయలసీమలోనూ అదే విధమైన ఇబ్బందులు ఎదుర్కుంటున్నారని చెప్పారు. తెలంగాణ, సీమాంధ్ర ఉద్యమాల వల్ల 6వేల కోట్ల రూపాయల పెట్టుబడులు వెనక్కి పోయాయని ఆయన ఆవేదన వ్యక్తం చేశారు.