నా సస్పెన్షన్ కెసిఆర్ దొరతనానికి నిదర్శనం: మాజీ ఎమ్మెల్యే కొమ్మూరి

హైదరాబాద్: ప్రత్యేక తెలంగాణ రాష్ట్ర ఏర్పాటుకు అసలు అడ్డంకి తెలంగాణ రాష్ట్ర సమితి అధ్యక్షుడు కె చంద్రశేఖరరావు అని ఆ పార్టీ సస్పెండ్ అయిన సీనియర్ నాయకుడు, మాజీ ఎమ్మెల్యే కొమ్మూరి ప్రతాపరెడ్డి ఆదివారం వ్యాఖ్యానించారు. కెసిఆర్ వల్ల తెలంగాణ రాదని అన్నారు. నన్ను సస్పెండ్ చేయడం కెసిఆర్ దొరతనానికి నిదర్శనమని ఆరోపించారు. కెసిఆర్ తన తప్పులను ప్రజాకోర్టులో నిరూపించుకోవాలన్నారు. తనను కూడా చేర్యాల నియోజకవర్గంలో ప్రజాకోర్టులో నిలబెట్టవచ్చునన్నారు.

ముఖ్యమంత్రి కిరణ్‌కుమార్ రెడ్డి రచ్చబండ కార్యక్రమాన్ని అడ్డుకోవాలని టిఆర్ఎస్ అధినేత కెసిఆర్ పిలుపునివ్వడాన్ని సంగారెడ్డి ఎమ్మెల్యే తూర్పు జయప్రకాశ్ రెడ్డి తప్పుపట్టారు. ప్రజలకోసం వేదిక అయిన రచ్చబండను అడ్డుకోవడం సరికాదన్నారు. టిఆర్ఎస్ నాయకులు దాడులు చేస్తే ప్రతిదాడులు ఉంటాయన్నారు. తెలంగాణ రాష్ట్రం సెంటిమెంటు పేరుతో కెసిఆర్ విద్యార్థుల ప్రాణాలతో చెలగాటమాడుతున్నారన్నారు. కెసిఆర్ రచ్చబండను అడ్డుకుంటే తాము టిఆర్ఎస్‌ సమావేశాలను అడ్డుకుంటామన్నారు. జాతీయ రహదారిని సైతం దిగ్బంధిస్తామని హెచ్చరించారు.