వైఎస్ జగన్ దీక్షకు టిఆర్ఎస్ ఎమ్మెల్యే కెటిఆర్ మద్దతు!

నల్లగొండ: మాజీ పార్లమెంటు సభ్యుడు వైఎస్ జగన్మోహన్ రెడ్డి దీక్షకు తెలంగాణ రాష్ట్ర సమితి మద్దతు తెలుపుతోంది. పార్లమెంటులో సమైక్య ఫ్లకార్డు ప్రదర్శించిన జగన్‌తో టిఆర్ఎస్ ఎన్నికలకోసం లోపాయకారి ఒప్పందం కుదుర్చుకున్నట్టు గతంలో వార్తలు వచ్చాయి. కాగా జగన్ ఫీజు రీయింబర్స్ నిధులు విడుదల చేయాలంటూ దీక్ష చేపడుతున్నారు. ఈ నేపథ్యంలో వైఎస్ జగన్‌తో సహా ఎవరు దీక్షలు చేపట్టిన వారికి టీఆర్‌ఎస్ నైతిక మద్దతు ఉంటుందని ఎమ్మెల్యే కల్వకుంట్ల తారకరామారావు స్పష్టంచేశారు. శనివారం ఆయన విలేకరులతో మాట్లాడుతూ ప్రభుత్వం నిధుల మంజూరులో జాప్యం చేస్తున్నదన్నారు.

నిధుల విడుదలలో జాప్యం చేస్తున్నదని ఆరోపించారు. ఈనెల 17లోగా ఫీజు రీయింబర్స్‌మెంట్ నిధులను విడుదల చేయకపోతే విద్యా సంస్థల బంద్‌ను నిర్వహిస్తామని అన్నారు. అసెంబ్లీని ముట్టడి చేస్తామని కెటిఆర్ హెచ్చరించారు. రుణమాఫీ కోసం పోచంపల్లిలో నెలరోజులుగా దీక్షలు చేస్తున్న చేనేత కార్మికులకు సంఘీభావంగా 9వ తారీఖున చౌటుప్పల్ మండలం శివారు పాంత్రం కొత్తగూడెం నుంచి కోదాడ వరకు జాతీయ రహదారిని దిగ్బంధం చేస్తామన్నారు. అప్పటికీ ప్రభుత్వం దిగిరాకపోతే 10న తెలంగాణ బంద్ నిర్వహిస్తామని చెప్పారు.

తెలుగు మ్యాట్రిమోనిలో మీకు నచ్చిన జీవిత భాగస్వామి ఎంపికలు - రిజిస్ట్రేషన్ ఉచితం!