అల్లరి నరేష్ చిత్రం షూటింగ్‌ను అడ్డుకున్న తెలంగాణవాదులు

By Srinivas

Published: Wednesday, March 2, 2011, 13:41 [IST]

హైదరాబాద్: అల్లరి నరేష్ హీరోగా, పూర్ణ హీరోయిన్‌గా నాగేశ్వర్ రెడ్డి దర్శకుడిగా విజయప్రసాద్ నిర్మిస్తున్న ఓ చిత్రాన్ని తెలంగాణవాదులు రంగారెడ్డి జిల్లాలోని చేవెళ్ల మండలం ఆలూరులో అడ్డుకున్నారు. పలువురు తెలంగాణవాదులు సినిమా చిత్రీకరణ కోసం వేసిన సెట్టింగ్‌ను పూర్తిగా ధ్వంసం చేసి సెట్టింగ్‌ను దగ్ధం చేశారు. తెలంగాణవాదులు చిత్రీకరణను అడ్డుకుంటున్న సమయంలో హీరో అల్లరి నరేష్, హీరోయిన్ పూర్ణ అక్కడే ఉన్నారు. అయితే చిత్రీకరణను అడ్డుకోవడంతో యూనిట్ అక్కడినుండి తిరుగు ముఖం పట్టింది.

అయితే చిత్రం చిత్రీకరణకు తమకు అనుమతి ఉందని, గత ఫిబ్రవరి 21నుండి 24వ తేది వరకు చిత్రీకరణ చేయాల్సి ఉండగా తెలంగాణ వాదులు కోరిక మేరకు ఆగామని, అయితే ఇప్పుడు మళ్లీ వారు వచ్చి సెట్టింగ్‌లను దగ్ధం చేశారని, అయితే ఇందులో ఎలాంటి పెద్దవాళ్ల హస్తం ఉందని తాము భావించడం లేదని, కేవలం చిన్నవాళ్ల ఆకతాయి మాదిరాగా చేసినట్టు ఉన్నారని నిర్మాత అంటున్నారు. పాట చిత్రీకరణ కోసమని సెట్టింగ్‌ కోసం రూ. పదిలక్షలు ఖర్చు పెట్టామని ఆయన ఆవేదన వ్యక్తం చేశారు.

Published On March 2, 2011