సమైక్యవాదులే లాడెన్లు, కెసిఆర్‌పై కేసులు సమైక్యవాదమా: హరీష్ రావు

హైదరాబాద్: సమైక్యవాదులే లాడెన్లు అని తెలంగాణ రాష్ట్ర సమితి (తెరాస) శాసనసభ్యుడు హరీష్ రావు అన్నారు. తమ పార్టీ అధ్యక్షుడు కె. చంద్రశేఖర రావును లాడెన్‌తో పోల్చడాన్ని ఆయన బుధవారం మీడియా ప్రతినిధుల సమావేశంలో వ్యతిరేకించారు. సమైక్యావాదులే లాడెన్లు, ఆల్ ఖేదాలు, దోపిడీదారులు, కుట్రదారులు అని ఆయన విరుచుకుపడ్డారు. కెసిఆర్‌పై సీమాంధ్రలో కేసులు పెట్టడం సమైక్యవాదమా అని ఆయన ప్రశ్నించారు.

పోలీసు శాఖలో 610 జీవోను అమలు చేయాలని ఆయన డిమాండ్ చేశారు. తెలంగాణకు ఉద్యోగాల్లో జరుగుతున్న అన్యాయాన్ని సరిదిద్దడానికి జారీ అయిన 610 జీవోను అమలు చేయాలని శాసనసభ ఏకగ్రీవంగా తీర్మానం చేసి ఏడాది దాటుతోందని, అయినా ప్రభుత్వం అమలు చేయించడం లేదని ఆయన అన్నారు. పోలీసు శాఖలో తెలంగాణవారికి అన్యాయం చేసే విధంగా ఉద్యోగ నియామకాలను ఆపేయాలని ఆయన డిమాండ్ చేశారు. అందుకు హోం మంత్రి సబితా ఇంద్రారెడ్డి తగిన చర్యలు తీసుకోవాలని ఆయన అన్నారు. లేకపోతే తాము సబితా ఇంద్రా రెడ్డి ఇంటి ముందు ధర్నా చేస్తామని ఆయన చెప్పారు.

English summary

TRS MLA Harish Rao terms united Andhrites as Ladens. He condemned Seemandhra leaders terming KCR as Laden.