చిరంజీవిని సిఎంగా చేసే ప్రయత్నాలు, తెలంగాణపై వైఖరి చెప్తాం: అంబటి

హైదరాబాద్: త్వరలో ముఖ్యమంత్రి కిరణ్ కుమార్ రెడ్డిని ముఖ్యమంత్రి పీఠం నుంచి దింపి ప్రజారాజ్యం పార్టీ అధ్యక్షుడు చిరంజీవిని ముఖ్యమంత్రిగా చేయడానికి ప్రయత్నాలు జరుగుతున్నాయని వైయస్ఆర్ కాంగ్రెసు పార్టీ నేత అంబటి రాంబాబు గురువారం ఓ టీవి ఛానల్ కార్యక్రమంలో మాట్లాడుతూ చెప్పారు. కిరణ్‌ను తప్పించి చిరంజీవిని ముఖ్యమంత్రిగా చేయడానికి తెరవెనుక ప్రయత్నాలు జరుగుతున్నాయని అన్నారు. ఉప ఎన్నికల ఫలితాల తర్వాత రాష్ట్ర రాజకీయాల్లో పెనుమార్పులు చోటు చేసుకుంటాయని ఆయన అన్నారు. కాంగ్రెసు ప్రభుత్వం పేకమేడలా కూలిపోవడం ఖాయమని అన్నారు.

పులివెందులలో విజయమ్మ, కడప నుండి మాజీ పార్లమెంటు సభ్యుడు వైయస్ జగన్మోహన్ రెడ్డిని ఓడించడానికి మంత్రి కన్నా లక్ష్మీనారాయణ ప్రయత్నాలు చేశారని అన్నారు. వారి ఓటమికి ప్రయత్నాలు చేసిన వారంతా ఫలితాలు వచ్చిన తర్వాత చూసి సిగ్గు పడతారన్నారు. త్వరలో తెలంగాణపై, ఎస్సీ వర్గీకరణపై మా వైఖరి తెలియజేస్తామని చెప్పారు. గ్రామీణ స్థాయిలో పార్టీని బలోపేతం చేస్తామని చెప్పారు.

English summary

YSR Congress party leader Ambati Rambabu suspected that congress high command is trying to transfer CM seat from Kiran Kumar Reddy to Chiranjeevi.