కోదండరామ్ టిఆర్ఎస్ ఏజెంట్, తెలంగాణపై బాబుకు చెప్పా: నాగం

హైదరాబాద్: తెలంగాణపై గత సాధారణ ఎన్నికలలో చేసిన తీర్మానానికి తెలుగుదేశం పార్టీ కట్టుబడి ఉంటే రాష్ట్రంలో పార్టీ పరిస్థితి బాగుంటుందని తాము అధినేత చంద్రబాబునాయుడుకు సూచించినట్టు ఆ పార్టీ సీనియర్ ఎమ్మెల్యే నాగం జనార్ధన్ రెడ్డి గురువారం పార్టీ పోలిట్ బ్యూరో సమావేశం ముగిసిన అనంతరం విలేకరులతో మాట్లాడుతూ చెప్పారు. తెలంగాణపై విస్తృత స్థాయి సమావేశం జరగాలని ఆయన అభిప్రాయపడ్డారు. నాగర్‌కర్నూల్‌లో నిర్వహించిన తెలంగాణ నగారా పార్టీకి వ్యతిరేకం కాదని ఆయన స్పష్టం చేశారు. పార్టీ ఆమోదంతోనే మరిన్ని సభలను తెలంగాణలోని అన్ని జిల్లాల్లో నిర్వహిస్తామని చెప్పారు.

తెలంగాణ రాజకీయ ఐక్య కార్యాచరణ సమితి చైర్మన్ కోదండరామ్ టిఆర్ఎస్ ఏజెంటుగా వ్యవహరిస్తున్నారని ఆరోపించారు. తెలంగాణ నగారాకు కోదండరామ్ రాకపోవడం సరికాదన్నారు. పార్టీలకతీతంగా సభను నిర్వహిస్తే కోదండరమ్ ఎందుకు రాలేదని ఆయన ప్రశ్నించారు. ఆయన టిఆర్ఎస్ తీసుకున్న నిర్ణయాలను అందరిపై రుద్దాలని చూస్తున్నారన్నారు. తెలంగాణ కోసం టిఆర్ఎస్ వాళ్లు వచ్చి ఎక్కడ పోరాటం చేస్తున్నారన్నారు. పార్టీ బయటకు వచ్చి పోరాటం చేయాలని కోదండరామ్ తనకు సూచించడాన్ని ఆయన ఖండించారు. పార్టీలో ఉంటూ పోరాటం చేయవద్దా అని ఆయన ప్రశ్నించారు.

English summary

TDP MLA Nagam Janardhan Reddy accused that Telangana JAC chairman Kodandaram is TRS agent. He said he suggested president Chandrababu Naidu on Telangana issue.