చిరంజీవికి మరో షాక్, ఎమ్మెల్యే అన్నా రాంబాబు రాజీనామా

By Pratap

Published: Thursday, May 12, 2011, 8:49 [IST]

హైదరాబాద్: ప్రజారాజ్యం పార్టీ అధ్యక్షుడు చిరంజీవికి మరో షాక్ తగిలింది. ప్రకా శం జిల్లా గిద్దలూరు శాసనసభ్యుడు (పీఆర్పీ) అన్నా రాంబాబు తన పదవికి రాజీనామా చేస్తూ లేఖను పార్టీ చిరంజీవికి పంపారు. నియోజకవర్గ అభివృద్ధి విషయంలో ప్రభుత్వం నుంచి ఆశించిన సహకారం లభించకపోవడంతో తీవ్ర అసంతృప్తిగా ఉన్నారని, ఆ మేరకే రాజీనామా నిర్ణయానికి వచ్చినట్లు తెలిసింది. దీనిపై ప్రజారాజ్యం అధినేత చిరంజీవి స్పందించారు. గిద్దలూరు నియోజకవర్గ సమస్యలపై రాష్ట్ర ప్రభుత్వంతో మాట్లాడతానన్నారు.

ఈ మేరకు రాంబాబుకు హామీ ఇచ్చినట్లు పార్టీ వర్గాలు తెలిపాయి. రాజీనామా నిజమేనని అన్నా రాంబాబు ఓ ప్రముఖ దినపత్రికతో చెప్పారు. కానీ, కారణాలు వివరించేందుకు, ఇతరత్రా అంశాలను ప్రస్తావించేందుకు అంగీకరించలేదు. ఆయన ఎన్నిక చెల్లదంటూ కోర్టులో ఉన్న కేసు వల్లే ఆయన రాజీనామా డ్రామా ఆడుతున్నారని ప్రత్యర్థులు ఆరోపిస్తున్నారు.

Published On May 12, 2011