ఇదేనా యుపి సిఎం మాయావతి తీరు, ఆగడాలు అడ్డుకోవాలి!: డిఎస్

By Srinivas

Published: Thursday, May 12, 2011, 14:10 [IST]

హైదరాబాద్: దళిత కార్డుతో అధికారంలోకి వచ్చిన ఉత్తర ప్రదేశ్ ముఖ్యమంత్రి మాయావతి దళిత వ్యతిరేకిగా మారిందని ప్రదేశ్ కాంగ్రెసు కమిటీ అధ్యక్షుడు డి శ్రీనివాస్ గురువారం గాంధీభవన్‌లో విమర్శించారు. దళితురాలైనప్పటికీ ఆమె దళితుల సమస్యలను పట్టించుకోవడం లేదన్నారు. ఏఐసిసి ప్రధాన కార్యదర్శి రాహుల్‌గాంధీ పట్ల ఉత్తర ప్రదేశ్ ప్రభుత్వం తీరు తలదించుకునేలా ఉందని అన్నారు. పేదల పక్షాన పోరాడుతున్న రాహుల్ గాంధీ అభినందనీయుడు అని అన్నారు. రాహుల్ పట్ల మాయావతి తీరును అందరూ ఖండించాలని అననారు.

రాహుల్ గాంధీ తనకున్న ప్రాణహాని దృష్ట్యా జాగ్రత్తగా ఉండాలని ఆయన విజ్ఞప్తి చేశారు. మాయావతి నియంతృత్వ పాలన కొనసాగిస్తుందన్నారు. ఆమె ఆగడాలను అడ్డుకోవాలన్నారు. మాయావతి రైతుల సంరక్షణ కూడా మరిచారని అన్నారు. రాష్ట్ర రైతాంగానికి కిరణ్ కుమార్ రెడ్డి ప్రభుత్వం అన్ని విధాలుగా సహకరిస్తోందన్నారు. రాహుల్ పోరాటానికి పిసిసి మద్దతు ఉంటుందని చెప్పారు. కాగా రాష్ట్రవ్యాప్తంగా మాయావతి తీరుకు నిరసనగా కాంగ్రెసు పార్టీ ఆందోళనలు నిర్వహించాయి. ఈ సందర్భంగా గాంధీ భవన్ ముందు మాయావతి దిష్టిబొమ్మను దగ్ధం చేశారు. మాయావతికి వ్యతిరేకంగా నినాదాలు చేశారు.

Published On May 12, 2011